Мин ыам ыйын 9 күнүгэр 1954 сыллаахха Уус Алдан улууһугар Тандаҕа төрөөбүтүм.
Ийэм ыам ыйын 8 күнүгэр талыыта киирэн ыалдьыбыт уонна түүн 24 ч. 45 мүн. төрөппүт. Ийэм барахсан биир күн эрдэ дьиэтигэр тахсаары, ахсыс чыыһыланан ыыттараары көрдөһө сатаабыт. Ону сэбиэскэй иитиилээх балыыһа үлэһиттэрэ буолумматахтар.
Онон мин дьиҥ чахчы Кыайыы күнүгэр төрөөммүн, суруйар псевдониммын Победа диэн ылыммытым.
Дойдум дьонун бүгүҥҥү үөрүүлээх, өрө күүрүүлээх сүдү суолталаах бырааһынньыгынан эҕэрдэлиибин!
Сэрии буолбатын! Туругурдун Эйэ! Ыалдьымаҥ, сүтүмэҥ!
Итинник кылгастык бэйэм туспунан билиһиннэрэн баран, Улуу Кыайыы өрөгөйдөөх күнүгэр анаан суруйбут хоһооннорбун билиһиннэрэрбин көҥүллээҥ!
САНЫАҤ БҮГҮН ХАЙААН ДА
Ахтар диэни даҕаны
Сайҕаатаҕа кэм кэрдии,
Ытыыр диэни даҕаны
Уоскуттулар ырыалар.
Уоскуйдахпыт иккиэн да,
Сааһырдахпыт иккиэн да,
Ол да буоллар бу күҥҥэ
Иккиэн санаан ылыахпыт.
Кыайыы күнүн үөрүүтэ
Кэрэ кэммит кэрчигэ,
Салют уотун чаҕыла
Таптал кыымын ыһара.
Саныаҥ бүгүн хайаан да,
Тасты умнар кыаҕыҥ суох.
Сылга биирдэ хайаан да
Оспут бааскын тыытыаҕым.
КЫАЙЫЫНЫ ТУОЙАБЫН
Мин Кыайыы күнүгэр
Төрөөбүт буоламмын
Мин Кыайыы былааҕын
Күөрэччи тутабын!
Ол оҕо саастартан
Бэтэрээн дьоннордуун
Алтыһан улаатан
Билэбин суолтатын.
Сэбиэскэй саллааттар
Сэриигэ кыайаннар
Бу бүгүн эн бааргын!
Бу бүгүн мин баарбын!
Төһөлөөх өлүүнү
Түөстэрэ тэлбитэй?
Төһөлөөх хааннара
Толооҥҥо сүүрбүтэй?
Төһөлөөх ийэни
Түүннэри ытатан?
Төһөлөөх оҕону
Тулаайах хаалларан?
Бу Кыайыы буолбутай?
Бу Кыайыы кэлбитэй?
Ким кыайан ааҕыаҕай?
Ким чопчу билиэҕэй?
Ол иһин туойабын,
Кыайыыны туойабын!
Элбэхпит биһиги
Кыайыыттан төрөөбүт!
ДЬЫЛҔА
(Дьоруой ийэ Ф.Малгина кэриэһигэр)
Малгиннары сахаҕа
Билбэт киһи суох буолуо,
Уоттаах сэрии кэмигэр
Толук буолбут биэс уолу.
Үрүҥ күнү көрдөрбүт
Ийэлэрэ барахсан
Көмүскэтэ куурбакка
Күрэннэҕэ бу сиртэн.
Ити Ийэ түөстэрин
Хайа мэтээл киэргэтиэй?
Өрүү күүппүт туругун
Ханнык уордьан уоскутуой?
Харах уута даҕаны
Таастыйдаҕа хайа муҥ,
Уолаттарын аатыгар
Гранит тааска сөҥнөҕө.
Дьылҕа араас өрүттээх
Уһун-кылгас үйэлээх:
Сорох тута умнуллар,
Сорох өлбөт үйэҕэ!
Полина-Победа,
Уус Алдан.
Хаартыска: pobedarf.ru