Санкт-Петербург куоракка саха биллиилээх лингвист-учуонайа Семен Андреевич Новгородов аатынан сквер баар буолла. Бу туһунан Ил Дархан Айсен Николаев бэйэтин телеграмыгар иһитиннэрдэ.
“Саха сирэ быйыл биллиилээх учуонай, сырдатааччы, саха бастакы алпаабытын оҥорбут Семен Андреевич Новгородов төрөөбүтэ 130 сылын бэлиэтиир. Бүгүн Саха сирин олохтоохторугар үөрүүлээх сонун кэллэ – Выборгскай оройуон Диагональнай, Грибалёва уонна Новолитовскай уулуссаларын икки ардыларыгар турар скверга Санкт-Петербург губернаторын уурааҕынан Семен Новгородов аатын иҥэрдилэр. Өрөспүүбүлүкэ бары олохтоохторун аатыттан Александр Дмитриевич Бегловка бэлиэ даатаҕа үтүө бэлэҕин иһин махтанабын”, — диэн Ил Дархан суруйда.
Чахчы дьоһуннаах бэлэх. Санатан эттэххэ, Семен Новгородов Петербурдааҕы университекка үөрэммитэ. Кыыһа Елена Семеновна Новгородова үйэтин тухары Санкт-Петербург куоракка олорбута, үлэлээбитэ. Ол эрээри, Саха сирин кытта сибээһин быспатаҕа.
“Саха сирэ” хаһыат, edersaas.ru