Санкт-Петербурга аан дойдутааҕы экэнэмиическэй форумҥа Саха сирэ кыттыаҕа

Бөлөххө киир:

Бүгүн бэс ыйын 6 күнүгэр Санкт-Петербург куоракка аан дойдутааҕы экэнэмиическэй форум үлэтин саҕалыаҕа. Манна уопсайа 140 дойдуттан 15 тыһыынча киһи мустан, национальнай сайдыы сүрүн соруктарын, аныгы технологиялары, аан дойдуга экэниэмикэ куурсун дьүүллэһиэхтэрэ.

edersaas.ru

Арассыыйа Кытайы кытта ыкса доҕордуу сыһыаннаах буолан, КНР Судаарыстыбаннай сүбэтин бэрэссэдээтэлэ Си Цзиньпин кэлэн дойду бэрисидьиэнин Владимир Путины кытта кэпсэтиэҕэ. Ол чэрчитинэн Шанхайдааҕы бииргэ үлэлэһии түмсүүтүн чилиэннэрэ (Арассыыйа, Кытай, Казахстан, Таджикистан, Кыргызтан, Узбекистан, Индия, Пакистан) олохтоох экэниэмикэни хайдах өрө таһааралларын ырытыһыахтара. Санатан эттэххэ, бу түмсүү 2001 сыллаахха тэриллэн, Евразия сирин 60% ылар. Манна 3,4 миллиард киһи олорор, онон ШОС кыаҕа сүҥкэн улахан.

Кэлэр сылларга Шанхайдааҕы түмсүү чилиэннэрин икки ардыларыгар тырааныспар сырыытын тупсарыахтара, табаар эргиирэ тэтимириэ. Аан дойдуга ньиэп-гаас бырамыысыланнаһын уларытан оҥоруу, саҥардан биэрии кэмэ кэлбитин,  экэниэмикэ үрдүкү технология диэки хайыһан, эмиэ уларыйан иһэрин бу форумҥа болҕомтоҕо ылыахтара. Интэриниэти туһанааччыларга сокуон өттүнэн бэрээдэги көрүү боппуруостарын эмиэ таарыйыахтара.

Сахабыт сириттэн бу форумҥа Ил Дархан Айсен Николаев уонна официальнай делегация кыттыахтара. Өрөспүүбүлүкэ аҕа баһылыга Арассыыйа улахан бааннарын салайааччыларын кытта көрсүөҕэ, РФ Тутуутун уонна ОДЬКХ миниистирэ Владимир Якушев инновационнай эрэгийиэн ахсааныгар киирэр губернатордары кытта көрсүһүүтүгэр сылдьыаҕа.

Национальнай бырайыактары олоххо киллэриигэ Айсен Николаев дойду бэрисидьиэнин дьаһалтатын, бырабыыталыстыба салалтатын кытта көрсүөҕэ. Спикер быһыытынан «Арассыыйа эрэгийиэннэригэр цифровой экэниэмикэ сайдыытын инники кэскилэ” диэн панельнай сессияҕа кыттыаҕа.

Бу форумҥа СӨ Бырабыыталыстыбата «Росконгресс» пуонданы, «Бырабыыталыстыба хамаандата» HR-бырайыагы олоххо киллэрэргэ Нижегородскай уобалас дьаһалтатын, «Сбербанк-Лизинг», ВЭБ.РФ сайдыытын Госкорпорациятын, «Роскосмос», «Росгеология» хампаанньаны кытта бииргэ үлэлэһии туһунан сөбүлэһии түһэрсиэҕэ.

Ону таһынан Ил Дархан «Полюс» генеральнай дириэктэрин Павел Грачеву, Индия посолун Венкатеш Варманы, РФ Тыатын хаһаайыстыбатын миниистирин солбуйааччыны, балыктааһыҥҥа федеральнай ааҕыныстыба салайааччытын Илья Шестакову кытта көрсүөҕэ.

Санкт-Петербурга аан дойдутааҕы экэнэмиическэй форумҥа China COSCO Shipping Corporation Limited, IKEA Group, Google Inc, Huawei Technologies Co о.д.а. улахан хампаанньалар кыттыахтара. Форум бэс ыйын 8 күнүгэр диэри үлэлиэҕэ.

Марианна Тыртыкова, «Саха сирэ», edersaas.ru

+1
0
+1
0
+1
0
+1
0
+1
0
+1
0
+1
0