Сүрүн Экэниэмикэ

Санкт-Петербурдааҕы экэнэмиичэскэй форумҥа Саха сирэ инвестиционнай кыаҕын билиһиннэриэҕэ

Санкт-Петербурдааҕы XXV экэнэмиичэскэй форум бэс ыйын 15-18 күннэригэр «Экспофорум» диэн киин киэҥ уораҕайыгар ыытыллыаҕа, онон  улахан тэрээһин бэҕэһээҥҥиттэн саҕаланна. 

Саха сирэ форумҥа инвестиционнай кыаҕын билиһиннэриэҕэ. Дэлэгээссийэни  Ил Дархан Айсен Николаев  салайар диэн пресс-сэкэритээр Афанасий Ноев иһитиннэрдэ. Бэҕэһээ, бэс ыйын 15 күнүгэр, Айсен Николаев  форум тэрээһиннэриттэн  сыыппара эйгэтигэр тылы чөл хаалларыыга аналлаах дьүүллэһии-кэпсэтиигэ кытынна, кини  ити хайысхаҕа Саха сирин уопутун туһунан кэпсээтэ.

Бэс ыйын 16-17 күннэригэр Ил Дархан форум пленарнай мунньаҕар уонна экэниэмикэ, тырааныспар, логистика, социальнай эйгэ боппуруостарыгар аналлаах  сиэссийэлэргэ кыттыаҕа.  Саха сиригэр инвестиционнай бырайыактары киллэриигэ үлэлииргэ бэлэмнэрин биллэрбит улахан хампаанньалар уонна федеральнай министиэристибэлэр  салайааччыларын, бэрэстэбиитэллэрин кытта көрсөн кэпсэтиэҕэ.

Санатар буоллахха, Үбүлүөйдээх тэрээһиҥҥэ  РФ Бырабыыталыстыбатын уонна  Киин баанын исписэлиистэрэ, Турция, Венесуэла, Египет, Италия, Канаада, АХШ уонна Франция дойдуларын биисинэскэ холбоһуктаах тэрилтэлэрин бэрэстэбиитэллэрэ кыттыахтара. Араас хабааннаах сиэссийэлэр тэриллэн үлэлиэхтэрэ. Холобур, аан дойду таһымыгар гаас ырыынагар аналлаах сиэссийэҕэ  РФ Бырабыыталыстыбатын бэрэссэдээтэлин солбуйааччы  Александр Новак уонна «Газпром» ПАУо бырабылыанньатын бэрэссэдээтэлэ Алексей Миллер дакылааттыахтара.   Бородууктанан хааччыйыыга куттал суох буолууга  сүрүн дакылааттары  РФ Бырабыыталыстыбатын бэрэссэдээтэлин  солбуйааччы Виктория Абрамченко уонна  Арассыыйаҕа уоҕурдууну оҥорооччулар ассоциацияларын  бэрэсидьиэнэ Андрей  Гурьев оҥоруохтара.  Эниэргийэнэн хааччыйыы боппуруостарыгар   «Газпром нефть» ПАУо бырабылыанньатын бэрэссэдээтэлэ Александр Дюков, «Росатом»  генеральнай дириэктэрэ Алексей Лихачев, «НОВАТЭК» ПАУо бырабылыанньатын бэрэссэдээтэлэ Леонид Михельсон санааларын үллэстиэхтэрэ.

 

0
0
Telegram Whatsapp