Кэбээйи улууһун Сангаар бөһүөлэгэр Вячеслав уонна Марина Стояногло дьиэ кэргэнэ даача тиэргэнин бүтүннүү саад оҥорбут. Манна биэс сылтан бэттэх сайын аайы оҕуруот аһын эгэлгэтин үүннэрэллэр. Ыал ийэтэ Марина биэнсийэлээх, аҕалара Вячеслав баһаарынай сигнализацияны туруоруунан дьарыктанар. Онон даача тиэргэнигэр видеокамера кытта баар. Ыал аҕата Вячеслав ааҕыытынан, оҕуруот аһын, мас отуттан тахса арааһа баар: моонньоҕон; оруоһабай, от күөх, маҥан, кыһыл хаптаҕас; араҕас, хара, кыһыл малина; вишня; слива-вишня; крыжовник; рябина; кизильник; кыһыл, хара отонноох рябина; яблоня; ирга; дуб; клен; липа; барбарис; айва; акация; бузина; сирень; облепиха; дьэдьэн; кипарис; сугун; сибэкки эгэлгэтэ…
Вячеслав Стояногло:
— Үүнээйини үксүн Ботаническай саадтан ылабыт, интэриниэтинэн сакаастыыбыт. Саха сиригэр тугу баҕарар үүннэриэххэ сөп диэни биһиги дакаастаатыбыт. Кыһыары саҥа үүнэн эрэр мастары тоҥмотуннар диэн, күрүчүөгүнэн сиргэр аллараа баттыыбыт. Тыалтан, хаартан харыстаан. Оттон улааппыттарын кэннэ, онто суох кыстыыллар.
Биһигиттэн олордууга диэн, бэлэм кыра мастары эмиэ ылаллар. Атын садоводтары кытта билсэбит, уопут атастаһабыт.
Бу даачабытыгар ыам ыйын саҥата көһөн кэлэбит, балаҕан ыйын бүтүүтэ төттөрү көһөбүт. Сангаар киинигэр элбэх кыбартыылаах уопсай дьиэҕэ олоробут. Уонна, дьэ, кыһыны быһа даачабытыгар көһөөрү сааһы күүтэбит.
Учаастагы биэс сыллааҕыта анаан малина үүннэрээри атыыласпыппыт. Онтон кэҥэтэн, элбэтэн иһэбит. Уопсайынан, үүнээйинэн дьарыктаммыппыт уон сылтан орто. Сиэн кыргыттарбыт малинаны олус сөбүлүүллэр. Биирэ – араҕас малинаны, иккиһэ – кыһылы.
Ойуурга отоннуу, тэллэйдии эрэ барабыт. Бэйэбит оҕуруоппутуттан барыанньалыыбыт. Аймахтарбытыгар, доҕотторбутугар түҥэтэбит. Гаас баара буоллар, кыһыны быһа оҕуруоппутун үүннэриэх этибит.
Хотугу, тыаллаах дойдуга маннык элбэх оҕуруот аһа, мас арааһа үүнэрин киһи сөҕөр. Стоянголо дьиэ кэргэнэ быйыл акация маһын дьаһалтаҕа, тэрилтэлэринэн түҥэппиттэр, Сангаар тас көстүүтүн киэргэппиттэр. Акация сибэккитэ тылыннаҕына, олус кэрэ. Соҕуруу дойду маһа буоллаҕа.
- Хаартыска: Надежда САМСОНОВА