Антонина Харитонова салайааччылаах Хамаҕатта нэһилиэгин «Түһүлгэ» норуот айымньытын киинэ сонунтан сонун, бииртэн биир кэрэхсэнэр тэрээһиннэри ыытан, нэһилиэнньэ махталын ылыан ылар.
edersaas
Манна үлэлэригэр бэриниилээх, талааннаах, дьону тылларыгар киллэрэр ураты дьоҕурдаах дьон биир сомоҕо буолан айымньылаахтык үлэлииллэр.
Кинилэр кулун тутар 7 күнүгэр «Сүрэхпэр кистээбит айар кутум» диэн улуус айар куттаах дьахталларын түмэн, дьон-сэргэ болҕомтотун киинигэр таһаардылар. Маннык тэрээһин быйыл иккиһин ыытылынна. Былырыын култуураҕа сыһыаннаах, ыллыыр-туойар, үҥкүүлүүр, тарбахтарыгар талааннаах 14 Далбар Хотун үлэтин-хамнаһын, сатабылын киэҥ араҥаҕа таһаарбыта. Онно мин улаханнык ытыктыыр, талааныгар сүгүрүйэр биир идэлээхпин Зинаида Понохованы норуот маастарын, кэрэ киһи быһыытынан арыйан кыттыбытым. Оттон быйылгы тэрээһиҥҥэ улуус үрдүнэн биллэр, араас ааттаах-суоллаах кэрэ аҥаардары кытта ыҥырыылаах ыалдьыт быһыытынан кыттар чиэскэ тиксэммин, улаханнык соһуйдум, үөрдүм, долгуйдум…
Тэрээһин ааптара, СӨ култууратын туйгуна, СӨ ырыа айааччыларын түмсүүтүн чилиэнэ Т.М. Гаврильева «Күөрэгэй» уонна «Кэрэ» ырыалара ылланан, ураты истиҥ эйгэни үөскэттилэр. Ыҥырыылаах ыалдьыттарынан буоллулар тус олохторугар, үлэлэригэр-хамнастарыгар, уопсастыбаннай үлэҕэ кэккэ ситиһиилэрдээх 7 Далбар Хотун.
Кимнээх кыттыбыттарын билиһиннэрдэххэ:
—Өр сылларга Хамаҕатта уонна II Хомустаах баһылыгын солбуйааччытынан үлэлээбит, билигин нэһилиэк дьаһалтатыгар тыа хаһаайыстыбатын исписэлииһинэн үлэлиир, 1 оҕолоох, 1 сиэннээх, хаһаайыстыбаннайынан үтүө холобурга сылдьар Галина Габышева;
-Саха-французскай лиссиэй биир бастыҥ үлэһитэ, социальнай педагог, «Сайдам» түөлбэ салайааччыта, 1 оҕолоох, 2 сиэннээх, тарбахтарыгар дьоҕурдаах Люция Ушницкая;
-«Сарыал» уһуйаан сэбиэдиссэйэ, 4 оҕолоох, мындыр салайааччы Саргылаана Индеева;
-Сибэккиттэн саҕалаан виноградка тиийэ үүннэрэр, хас биирдии ыал умсугуйан ааҕар, олус туһалаах «Сибэкки сипсиэрэ» кинигэ ааптара, Ленскэй нэһилиэк Ытык олохтооҕо, нуучча тылын учуутала идэлээх, билигин урбаанньытынан ситиһиилээхтик үлэлии-хамсыы сылдьар, 3 кыыстаах, 7 сиэннээх Евдокия Гаврильева-Сибэкки Евдокия;
-Улуус инбэлииттэрин түмсүүтүн уонтан тахса сыл таһаарыылаахтык салайа сылдьар, 2 оҕолоох, олоххо тардыһыытынан дьону сөхтөрөр Матрена Иванова;
-Улуус Култуураҕа уонна Духуобунаска салалтатын режиссера, 2 оҕолоох Алла Максимова;
-Намнааҕы педагогическай кэллиэскэ эбии үөрэхтээһин педагога, 3 оҕо ийэтэ, 4 оҕо эбэтэ Прасковья Байанаева.
Биһигини олохпут аргыстара, биир идэлээхтэрбит, чугастык алтыһар дьоммут, дьүөгэлэрбит истиҥник эҕэрдэлээтилэр, бэлэх биэрдилэр, сибэкки дьөрбөтүн туттардылар.
Тэрээһини СӨ култууратын туйгуннара: уус-уран салайааччы Татьяна Гаврильева, методист Надежда Макарова уонна фольклор ансаамбылын салайааччыта, эдэркээн Оксана Кудрина иилээн-саҕалаан ыыттылар. Дириэктэр Антонина Алексеевна ыалдьыттарыгар анаабыт бэлэхтэрин куоратынан, Намынан ылаттаабыт, тэрээһин ыытыллыытын ыпсаран, ситэрэн-хоторон биэртэлээбитэ олус үчүгэйдик таҕыста. Бу курдук сэргэх, истиҥ иэйиилээх киэһэ буолан ааста. Ону кыттааччылар, сылдьыбыт дьон бары бэлиэтээтилэр, тэрийээччилэргэ махтал тылларын эттилэр.
Прасковья БАЙАНАЕВА, “Саха сирэ”, edersaas cайтка анаан