Соторутааҕыта “Полярные авиа-линии” авиа-хампаанньа Маҕаннааҕы комплексыгар саҥа авиационнай ангаары үөрүүлээхтик арыйдылар уонна медицинскэй тэриллээх саҥа Ми-8 МТВ бөртөлүөттэри киэҥ араҥаҕа көрдөрдүлэр.
“Олох хойукка диэри маннык толору медицинскэй хааччылыылаах бөртөлүөттэр суохтара. Билигин Саха сирэ санитарнай авиацияны сайыннарыыга федеральнай бырайыак көҕүлээччитэ буолла. Бырайыагы көмүскээн, Арассыыйа үрдүнэн санитарнай авиацияны сайыннарыыга саамай элбэх субвенцияны ылабыт. Ол үп сыл аайы 460 мөл. солк. тэҥнэһэр. Оттон өҥөнү нэһилиэнньэҕэ тиэрдэр хампаанньанан “Полярные авиалинии” тэрилтэ буолар”,
— диэтэ СӨ доруобуйа харыстабылын миниистирэ Михаил Охлопков.
Бырабыыталыстыба бэрэссэдээтэлин бастакы солбуйааччы Алексей Колодезников хампаанньа кэлэктиибигэр махтанна уонна салгын флотугар Саха сиригэр улахан болҕомто уурулларын бэлиэтээтэ.
Саҥа арыллыбыт ангаарга тиэхиньиктэр уонна инженердэр сөмөлүөттэри уонна бөртөлүөттэри түүннэри-күнүстэри өрүмүөннүүр, көрөр-харайар кыахтаннылар. Сотору кэминэн ангаар толору хааччыллыылаах буолуоҕа.
Тутуу үөрүүлээх арыллыытын Саха сирин епархиятын бастакы сэкирэтээрэ Никандр Иеромонах алҕаата уонна Дьокуускайдааҕы уонна Ленскэйдээҕи архиепископ Романтан эҕэрдэ тиэртэ.
Бу күн авиахампаанньаҕа өр сылларга сыралаахтык үлэлээбит бэтэрээннэр бочуоттаах наҕараадалары ыллылар.
Николай Попов, «Саха сирэ» хаһыат, edersaas.ru