Алтынньы 18 – сэтинньи 4 күннэригэр Айхалга, Удачнайга уонна Мирнэйгэ «Санаа суһума» бэстибээли «АЛРОСА” хампаанньа тэрийэн, үбүлээн ыытта. Манна Арассыыйа үрдүнэн биллэр спортсменнар, акробатическай рок-н-ролл, брейк-данс уонна буги-вуги чаҕылхай сулустара кэлэн умнуллубат дьоро киэһэлэри бэлэхтээтилэр, алмаастаах кыраай олохтоохторун сүрэхтэрин өрүкүттүлэр.
edersaas.ru
Түргэн тэтимнээх, акробатическай хамсаныылаах спортивнай үҥкүүнэн үлүһүйэр оҕолор уонна эдэр ыччат икки нэдиэлэ устата босхо үөрэххэ сырыттылар, үҥкүү күрэҕин (баттлын) көрдүлэр, кыахтарын холоно таарыйа бастыҥ үҥкүүһүттэри кытта күрэхтэстилэр.
Спортивнай үҥкүү алыба
«Санаа суһумун» саҕар бастакы бэстибээл былырыын ахсынньыга ыытыллыбыта. Онно спортивнай үҥкүү уонна акробатическай рок-н-ролл Бүтүн Арассыыйатааҕы федерациятын көмөтүнэн баскетбол уонна үҥкүү сулустара кэлэн барбыттара.
Быйыл тэрээһин салҕанан, бу саас муус устарга Арассыыйа хоккейга тумус туттар дьоно Михаил Васильев, Игорь Григоренко, Александр Бойков кэлэн мууска тиэхиньикэ албастарыгар уолаттары үөрэтэн, маастар-кылаас биэрбиттэрэ.
Тустууга – Олимпиада чөмпүйүөнэ
Онтон ыам ыйыгар алмаастаах куоракка оскуола оҕолорун кытта көрсүһүүгэ тустууга Олимпийскай оонньуулар кыайыылаахтара Давит Чакветадзе уонна Олимпиада призердара Сергей Семенов, Валерия Коблова кэлэ сылдьыбыттара.
Улахан спорт чаҕылхай сулустара бэйэлэрин тус холобурдарынан кыайыыга дьүккүөрдээх дьулуурга, ис санааны бөҕөргөтүнүүгэ, сылбырҕа хамсаныыга Мирнэй оҕолорун успуорт умсугутуулаах эйгэтигэр уһуйаллар.
Арассыыйа сүүмэрдэммит хамаандатын тириэньэрэ
«ВТБ биир кэлим лиигатын» кыттыылаахтара Мирнэйгэ, Айхалга, Удачнайга баскетболга 34 үөрэтэр дьарыктары ыыппыттара. Арассыыйа сүүмэрдэммит хамаандатын урукку хапытаана Сергей Быков, Европа чөмпүйүөнэ, баскетболга Арассыыйа сүүмэрдэммит хамаандатын тириэньэрэ Сергей Базаревич уонна устудьуоннар сборнайдарын тренерэ Анатолий Лаптев иккис төгүлүн кэлэн, эдэр ыччаты дьарыктаатылар.
Кинилэр алмаастаах дойду дьоно мээчиги кытта үлэлииргэ бэлэмнээхтэрин, оскуолалар спортивнай тэрилинэн хааччыллыылара үчүгэйин бэлиэтээтилэр.
«МАТЧ-ТВ» ыытааччыта Дмитрий Матеранскай Мирнэй уонна «ВТБ биир кэлим лиигатын» маастардарын оонньуутун кэпсээн-ипсээн күлүбүрэттэ уонна оҕолору успуорду күөх экраҥҥа хайдах сырдатарга үөрэттэ.
Алексей Кондаков, «АЛРОСА-ГАЗ» тэхиньиичэскэй сулууспатын диспетчерэ:
— Маннык тэрээһиҥҥэ иккис төгүлүн кыттабын. Баскетболу сөбүлүүр дьоҥҥо бу улахан бырааһынньык, бүтүн Арассыыйа сүүмэрдэммит хамаандатын тириэньэрин кытта илии тутуһар чиэскэ тиксибиппиттэн үөрэбин. Оскуола оҕолоругар ымсыырабын. Биһиги оҕо сааспытыгар итинник дьарыктары ыыталлара буоллар, идэтийбит баскетболист буола үүнэн-сайдан тахсыам этэ.
Стритболга биир бииргэ урукку өттүгэр Арассыыйа чиэһин Олимпиадаҕа көмүскээбит киһини кытта оонньуур олус долгутуулаах. Сергей билигин ыччаты дьарыктыыр эрээри, урукку таһымын, сытыытын-сылбырҕатын ыһыктыбатаҕа тута көстөр, кими баҕарар кыайар кыахтаах.
«Короче» кылгас киинэ бэстибээлэ
Бу күһүн бэстибээл чэрчитинэн кылгас бириэмэлээх киинэ көрдөрүүтүн тэрийэн ыыппыттара. Улахан экраҥҥа драматтан саҕалаан, кэмиэдийэҕэ тиийэ таһаарбыттара.
Евгения Гришанова, Мирнэй оройуонун социальнай хайысхалаах кэммиэрчэскэйэ суох түмсүүлэрин координатора:
— Биһиги куораппытыгар маннык киинэлэри аҕалан көрдөрбүттэрэ олус үчүгэй. Кылгастар эрээри, киһини олох туһунан толкуйдаталлар, дириҥ ис хоһоонноохтор. Бу киһи биирдэ көрөн баран таһырдьа тахсаат тута умнан кэбиһэр киинэтэ буолбатах, өйгөр-санааҕар өргө диэри сөҥөн хаалар өйдөбүлү хаалларар.
Анастасия Усманова, АЛРОСА тутууга управлениетын инженерэ:
— Тус бэйэм «Төрөөбүт күн», «Дима», «Чэппиэр» киинэлэри сөбүлээтим. Үһүөн кылгас эрээри, киһи дууһатын кылын таарыйан, сүрэххэр өтөн киирэллэр, олоххо баары көрдөрөллөр. Сороҕор киһи уйадыйан да ылар, элбэҕи эргитэ саныыгын.
34 анал дьарык
Бэстибээлгэ Арассыыйа уонна аан дойду биллэр үҥкүүһүттэрэ хаһыс да төгүлүн кэлэн акробатическай рок-н-роллга, буги-вугига уонна брейк-данска 34 дьарыгы ыыттылар. Сэтинньи 4 күнүгэр өрөспүүбүлүкэ бастакы чемпионатыгар 115 үҥкүүһүт кытынна. Рок-н-ролл акробатическай элэмиэннэрдээх буолан, уолаттар кыргыттарын үөһэ өрө быраҕаллар, илиилэриттэн-атахтарыттан тутан ылан эргитэллэр, сальто оҥороллор. Көрдөххө, ылбычча киһи киирсибэт үҥкүүтэ.
«Москватааҕы күрэхтэһиигэ маннык саалаҕа толору дьон мустара буоллар», — диэн Мирнэйгэ кэлэ сылдьан акробатическай рок-н-роллга аан дойду чөмпүйүөҥкэтэ Надежда Долгополова бэйэтин “Инстаграмыгар” суруйбут этэ.
Финалга тахсыбыт үҥкүүһүттэргэ кэлэр күрэхтэһии ахсынньы 21 күнүгэр Орел куоракка ыытыллыаҕа.
Денис Салахутдинов, «Уулусса тэтимэ» брейкданс бөлөҕүн салайааччыта:
— O.B.C. Crew хамаанда уолаттарын маастар-кылааһын көрөн баран дьарыкпытын тосту уларыттыбыт, саҥа сүүрээни киллэрдибит, ол хайысхабыт саҥа кэлбит оҕолору түргэнник үөрэтэргэ көмөлөһөр, таһымнарын көтөҕөр. Бэстибээл иһинэн брейкиҥҥэ күрэх киллэрэллэрэ буоллар диэн баҕа санаалаахпыт. Оччотугар салгыы сайдарга, күрэхтэһэргэ, бастыҥнары наҕараадалыырга табыгастаах усулуобуйа тэриллиэ этэ.
Диана Трушникова, ХИФУ Мирнэйдээҕи политехническай институтун устудьуона:
— Күрэххэ кыахпыт баарынан тугу сатыырбытын барытын көрдөрдүбүт эрээри, миэстэлэспэтибит. Онон салгыы дьарыктанарга дьулуһабыт. Дьарыктарга сылдьан элбэх саҥаны биллибит, ону барытын тута хатылыыр уустук эрээри, бириэмэ баар, салгыы сайдан, чочуйан, тупсаран иһиэхпит. Маннык үҥкүү түргэн тэтимэ киһи сүргэтин көтөҕөр, эт-хаан өттүнэн сайыннарар.
Мирнэйгэ — Илзе Лиепа ыалдьыттаата
«Санаа суһума» бэстибээл алмаастаах кыраайга күлүмүрдээн ааста даҕаны, сэргэх тэрээһин манан түмүктэммэт. Сэтинньи 16 күнүгэр Мирнэйгэ «Марис Лиепа. Гала» балет артыыстарын улахан кэнсиэрэ буолан ааста. Аан дойдуга аатырбыт үҥкүүһүт Илзе Лиепа үҥкүүһүттэрин бөлөҕүн аҕалан, анал дьарык ыытан, «Саха сирин алмаастара» оҕо балекка тыйаатырын эрчийдэ. Балерина кэлэригэр кырачаан бэйэтин айар кэнсиэр бэлэмнээн көрүстүлэр, тугу сатыылларын көрдөрдүлэр.
Онон АЛРОСА хампаанньа Арассыыйаҕа, аан дойдуга биллэр спортсменнары, тириэньэрдэри, сүүмэрдэммит хамаанда хапытааннарын, үҥкүүһүттэри сылга хаста даҕаны аҕалан, үүнэр көлүөнэ дьарыктанарыгар табыгастаах услуобуйа тэрийэр. Ким билэр, баҕар, аны аҕыйах сылынан Европа чөмпүйүөннэрэ, Олимпиада кыайыылаахтара Сахабыт сириттэн саҕыллан тахсыахтара.
Марианна Тыртыкова, «Саха сирэ», edersaas.ru