Саха Өрөспүүбүлүкэтин үтүөлээх суруналыыһа, суруйааччы, Саха телевидениетыгар “Сардаана” биэрии ыытааччыта Сардаана Сивцева сценарийынан өссө биир сериал көрөөччүлэр дьүүллэригэр тахсыаҕа.
edersaas.ru
Даана Сард сценарийынан уһуллубут “Сүлүһүннээх таптал” 16 сериялаах сериал 2019 сыл тохсунньу 9 күнүттэн биир ый устата бэнидиэнньиктэн чэппиэргэ диэри көстүөҕэ.
“Сүлүһүннээх таптал” сүрэхтэниитин кэмигэр исписэлиистэр сыаналаабыттарынан, бу мистическай хабааннаах сериал — саха кинематографиятыгар саҥа көстүү.
Устааччылар бастакы серияларга саха үгэһинэн сайылыкка тахсыбыт икки ыал майгытын-сигилитин, олохторун-дьаһахтарын билиһиннэрэллэр. Дьэ, онтон сыыйа-баайа араас киһи үөйбэтэх-ахтыбатах быһылааннара саҕаланан, көрөөччүнү долгуталлар. Онон, ый устата ааспыт үйэ 70-с сылларыгар биир кыра сэлиэнньэ олоҕор тахсыбыт түбэлтэлэри, мучумааннары быһаара сатааһын күүрүүлээх түгэннэрин сибидиэтэллэрэ буолуохпут.
Сүрүн оруолларга идэлээх артыыстар, Саха тыйаатырын артыыстара Елизавета Потапова, Надежда Ушницкая, Дмитрий Михайлов,Ньурбатааҕы көһө сылдьар дыраама тыйаатырын артыыһа Майя Слепцова, Уус Алданнааҕы эбии үөрэхтээһин учуутала Афанасий Карамзин, атын оруолларга уонна эпизодтарга Анатолий Спиридонов, Надежда Заболоцкая, Алексей Ходулов уонна Чурапчы улууһун Бахсы с. олохтоохторо, үөрэнээччилэрэ, култуура уонна искусство кэллиэһин устудьуоннара оонньоотулар.
Сериалы быйыл сайын балтараа ый устата Саха тыйаатырын биллиилээх артыыстара, искусство деятеллэрэ үөскээн тахсыбыт ытык Бахсы сиригэр уһуллулар.
Туруорааччы-режиссер – Елена Эверстова, продюсер – Марина Пермякова, туруорааччы-оператор – Александр Слепцов, оператор – Гаврил Дьячков.
Манна сыһыаран эттэххэ, “Саха” Көрдөрөр-иһитиннэрэр хампаанньа сериалларга аналлаах саҥа саайт арыйыаҕа, ону көрөр төлөбүрдээх буолуоҕа. Мантан инньэ өссө элбэх сахалыы киинэлэри, сериаллары өрөспүүбүлүкэ ыраах сытар улуустара бары көрөр буолаллара кэрэхсэбиллээх.
Надежда ЕГОРОВА, “Саха сирэ” хаһыат, edersaa