«Самыртай» түмэл-комплексыгар үөрүүлээх, долгутуулаах тэрээһин буолла.
Түмэли төрүттээбит, Хаҥалас сирин-уотун бэриниилээх ытык киһитэ, кыраайы үөрэтээччи, СӨ Култууратын туйгуна, 2 Дьөппөн Бочуоттаах олохтооҕо, «Гражданскай килбиэн» бэлиэ хаһаайына Роберт Захаров аатын үйэтитэр мемориальнай дуосканы арыйдылар.
«Роберт Константинович түмэли атаҕар туруорарга элбэх сыратын уурбут ытык киһи. Бу музей кини аатын кытары быстыспат ситимнээх. Манна киһини улаханнык долгутар устуоруйа, архитектура өйдөбүнньүктэрэ бааллар. Ол курдук, улууспутугар бу күҥҥэ диэри тиийэн кэлбит соҕотох, ураты өйдөбүнньүк — Хачыкааттааҕы Николаевскай таҥара дьиэтэ. 1892 сыллаахха тутуллубут. Баай, меценат С.П.Барашков бурдук куурдар тэрилэ, 18-с үйэҕэ тутуллубут алта кырыылаах бабаарына, 19-с үйэҕэ Манчаарыттан көмүскэнэргэ диэн ааттаан тутуллубут икки мэндиэмэннээх баай Кирилл Скрябин ампаара, 18-с үйэтээҕи сайыҥҥы балаҕан бааллар«, — диэн улуус баһылыга Олег Иринеев бу долгутуулаах түгэҥҥэ мустубут дьоҥҥо сырдатта. «Роберт Константинович ылсыбыт үлэтин, дьыалатын ис сүрэҕиттэн таптыыр, бэриниилээх киһи этэ. Кини биһиэхэ барыбытыгар үтүө холобур буолар«, — диэтэ.
Мемориальнай дуосканы арыйыы долгутуулаах тэрээһинигэр уонна «Үтүө түһүлгэм түстэннин…» өйдөбүнньүк киэһээтигэр улуус баһылыгын бастакы солбуйааччы Андрей Варламов, култуура уонна духуобунай сайдыы управлениетын начаалынньыга Сахаайа Громова, кыраайы үөрэтэр улуустааҕы түмэл дириэктэрэ Алексей Третьяков, оройуон шахмаччыттарын федерациятын бэрэссэдээтэлэ Родион Кононов, 2 Дьөппөн нэһилиэгин баһылыга Александр Константинов кытыннылар.
Түмэли тэрийбит ытык киһи Роберт Константинович төрөөбүтэ 80 сылыгар анаммыт «Үтүө түһүлгэм түстэннин…» тэрээһиҥҥэ доҕотторо, үлэтинэн чугастык алтыспыт табаарыстара, кэллиэгэлэрэ, чугас дьоно-сэргэтэ истиҥ ахтыыларын оҥордулар. Дойдутун туһугар олус бэриниилээх, үлэни өрө туппу, түмэли тэрийбит, атаҕар туруорбут энтузиаст, ураты кэрэ киһи олоҕун-дьаһаҕын, үлэтин-хамнаһын сэһэргиир быыстапканы, истиэндэни ыалдьыттар олус сэргээн, кэрэхсээн көрдүлэр.