Атырдьах ыйын 12 күнүгэр Хатас сэлиэнньэтигэр дьоҥҥо холобур буолар тэрээһин буолан ааста. Бу дьоллоох олох туһугар кыргыһыы хонуутугар хаалбыттарга эбэтэр сэрииттэн эргиллэн кэлэн баран, сэрии урусхалын туоратарга дойду туһугар үлэлээбит Саллаат пааматынньыгын сэргэхситэр, тупсарар туһугар үп-харчы хомуйуутугар анаммыт тэрээһин ыытылынна.
edersaas.ru
Бастатан туран, биллэн турар, дьаарбаҥка тэрилиннэ. Күһүҥҥү киһи күлбүтүнэн сылдьар кэмэ чугаһаабытын быһыытынан, оҕуруот аһын талбыта баар. Аны бурдук ас арааһа, бэл диэтэр ыраастаммыт мундуга тиийэ уурулунна. Отон, сугун, биэ эмиийин барыанньалара, үрүҥ ас талбыта, кабачоктан туорт, сибиэһэй хортуоска хамаҕатык атыыга бардылар. Хатаспыт сибэккилэрин минньигэһин иҥэриммит, туох да булкааһа суох мүөтү эмиэ, этэргэ дылы, өр көрдөһүннэрэ барбакка бэрт түргэнник ыллылар.
Дьаарбаҥкабыт биир бэлиэ уонна киһи убаастабылын ылбыт түгэнинэн Альбина Александровна Прокопьева дьиэ кэргэнэ — оҕолоро, сиэннэрэ 8800 солк. биэрбиттэрэ буолла. Бу бачыымы, холобур Саллаат пааматынньыгар баар билиитэлэргэ суруллубут дьон аймахтара өйүөхтэрэ диэн улахан эрэл баар.
Бүгүҥҥү тэрээһиҥҥэ ордук тэрээһиннээхтик Маалгын (сал. Ефимова А.П), Туймаада (сал. Мокрощупова А.С) түөлбэлэр кытыннылар. Моисеевкалар (сал. Иванов Г.К) 8000 солкуобай харчынан уонна икки массыына кумаҕынан көмөлөстүлэр.
Уопсайа, бүгүҥҥү күҥҥэ 28640 солкуобай харчы киирдэ.
Дьэ, ити курдук маҥнайгы хардыы оҥоһулунна. Сардаҥа, Баҕарах-1, Баҕарах-2, Алаас, Агрогородок олохтоохторо бу хамсааһыҥҥа бары кыттыахтара диэн эрэлбит улахан. Норуот күүһэ — көмүөл күүһэ диэн мээнэҕэ эппэттэр.
Нина Павловна Осиповаҕа, Александра Михайловна Мокрощуповаҕа, Александра Петровна Осиповаҕа, Варвара Колосоваҕа, Наталья Петроваҕа, Тамара Ивановна Гоголеваҕа, Анна Ильинична Ефимоваҕа, Анисия Борисовна Колачёваҕа, Надежда Ивановна Кожинаҕа, Раиса Ивановна Корякинаҕа уо.д.а.бириэмэ булан, ас астаан аҕалбыттарыгар барҕа махтал.
Аныгыс сырыыга өссө элбиэххэйиҥ диэн ыҥырабыт.
“Саха сирэ”, edersaas.ru cайтка анаан Наталья РУФОВА.