Кремль “хара испииһэгэр” киллэриллибит уон күбүрүнээтэртэн иккитэ “баҕа өттүнэн” уурайда.
Бурятия Өрөспүүбүлүкэтин баһылыга Вячеслав Наговицын баҕа өттүнэн дуоһунаһыттан уурайыыта үгүстэргэ соһуччу буолла. Бэнидиэнньик күн аҕай өрөспүүбүлүкэ баһылыга дуоһунаһыттан уурайар санаата суох, кэлэр быыбарга бэйэтин кандидатуратын туруорунар баҕалаах диэн Новости РИА иһитиннэрэн турар.
Роман Попов, “Саха сирэ” хаһыат, https://edersaas.ru
Бүгүн, олунньу 7 күнүгэр, Вячеслав Наговицын уһун толкуй кэнниттэн маннык быһаарыыны ылынным, миигин ким да уурайарга күһэйбэтэҕэ диэн суруналыыстарга билиннэ. Кини өрөспүүбүлүкэ баһылыгын быыбарыгар РФ бэрэсидьиэнэ аныахтаах хандьыдаата регион дьонун-сэргэтин, олоҕун-дьаһаҕын кытта билсэригэр бириэмэ наада, бары хандьыдааттар тэҥ усулуобуйалаах буолуохтаахтар диэтэ, үһүс болдьоххо бэйэтин туруорумматын, салгыы судаарыстыбаннай сулууспаҕа үлэлиэн,өрөспүүбүлүкэҕэ, дойдуга туһалаах буолуон баҕарарын эттэ.
Бу иннинэ, бэнидиэнньиккэ, Пермь баһылыга Виктор Басаргин эмиэ дуоһунаһыттан уурайарын, РФ бэрэсидьиэнигэр киниэхэ саҥа сорудаҕы биэрэригэр көрдөһүү түһэрбитин туһунан иһитиннэрбитэ.
Санатар буоллахха, “Петербургская политика” пуонда тохсунньутааҕы рейтинигэр боломуочуйалара 2017 сылга бүтэр Карелия (Александр Худилайнен), Бурятия (Вячеслав Наговицын), Мордовия (Владимир Волков) баһылыктара, Томскай (Сергей Жвачкин), Саратов (Валерий Радаев), Белгород (Евгений Савченко), Рязань (Олег Ковалев), Свердловскай (Евгений Куйвашев), Новгород (Сергей Митин) уонна Ивановскай (Павел Коньков) уобаластар күбүрүнээтэрдэрэ дуоһунастарыттан ууратыллыахтарын сөбүн туһунан иһитиннэриини тарҕаппыта.
Роман Попов, “Саха сирэ” хаһыат, https://edersaas.ru