Салгын ааллара көтөллөрүгэр күн-дьыл туруга оруоллаах
Ойуур баһардарын умуруорууга ананан тэриллибит суһал ыстаап салайааччыта Дмитрий Садовников бүгүн, атырдьах ыйын 1 күнүгэр иһитиннэрбитинэн, өрөспүүбүлүкэ үрдүнэн 163 ойуур баһаара бэлиэтэнэр.
Бүгүҥҥү иһитиннэриинэн, уопсайа 541 495,4 га иэннээх сиргэ тарҕаммыт 51 ойуур баһаарын умуруорууга үлэ ыытылла турар. Уоту умуруорууга күүстээх үлэлэр Үөһээ Бүлүүгэ Кырыкыйга, Кэбээйигэ Сииттэҕэ уонна Горнайга Күөрэлээххэ ыытыллаллара бэлиэтэнэр.
Ааспыт хонука 3 баһаар умуоруоруллубут, 9 баһаар бохсуллубут, 5 саҥа баһаар көстүбүт. 2356 киһи уоту утары охсуһар, 276 тиэхиньикэ туһаныллар. Сииттэ таһынааҕы баһаарга Ми-8 бөртөлүөт түөртэ кырынан 78 туонна ууну куппут. Маннык бөртөлүөттэр Хаҥалас, Кэбээйи уонна Өлүөхүмэ улуустарыгар үлэлииллэр.
Вице-премерь этэринэн, күүстээх буруоттан сылтаан Мииринэйгэ баазаламмыт авиация кыайан көппөккө турар. Уоту умуруорууга туһаныллар салгын ааллара дьону таһар авиацияттан лаппа аллараанан көтөллөр, онон үлэлиир эрэсиимэ буруо тарҕаныытыттан тутулуктаах. Синоптиктар сабаҕалааһыннарынан, ити диэки тыал хайысхата атырдьах ыйын 2 күнүгэр күнүс 15.00 чаас кэнниттэн уларыйыан сөп. Оччоҕуна Мииринэйгэ баар көтөр ааллар үлэлэрин саҕалаабытынан барыахтара. Күнү-дьылы билгэлииллэринэн, нэдиэлэ бастакы күнүттэн Саха сирин соҕуруу уонна арҕаа оройуоннарыгар былыттаныан сөп.
«Саха сирэ» хаһыат, edersaas.ru
Хаартыска sakha.gov.ru