Салайар хампаанньа тустаах үлэтин толорботоҕуна, Госстройжилнадзорга үҥсүөххэ сөп
Дьиэ үрдүттэн кэмигэр хаары түһэрбэккэ киһи үрдүгэр улахан муус түһэн эчэттэҕинэ, эбэтэр элбэх кыбартыыралаах дьиэ тиэргэнигэр килэрийэ сытар мууска ким эмит халтарыйан илиитин-атаҕын тоһуттаҕына, эппиэтинэһи элбэх кыбартыыралаах дьиэлэри салайар хампаанньа сүгэр. Ол иһин маннык түгэн тахсыбатын туһугар билиҥҥиттэн сэрэтэр үлэни ыытыахтаахтар.
edersaas.ru
Бүгүн, олунньу 19 күнүгэр, Госстройжилнадзор Саха сиринээҕи управлениетын салайааччыта Наталья Чусовская биэдэмистибэ аатыгар нэһилиэнньэттэн туох-ханнык үҥсүү киирэрин, салайар хампаанньалар үлэлэрин судаарыстыба хайдах хонтуруоллуурун туһунан билиһиннэрдэ.
Госстройжилнадзорга 2017 сыллаахха салайар хампаанньалар итэҕэстэрин-быһаҕастарын ыйар 4700, 2018 сыллаахха 4034 үҥсүү киирбит. Дьон үксэ хомунаалынай хаһаайыстыба үлэтин хаачыстыбатыгар, ОДьКХ төлөбүрүн сөпкө ааҕыыга үҥсэргиир.
Биһиги бары хапытаалынай өрөмүөҥҥэ диэн төлүүбүт эрээри, ону уопсай хочуолга уктахха, дьиэ өрөмүөнүн уочарата кырата 15-20 сылынан биирдэ кэлэр. Ол иһин олохтоохтор уопсай мунньахтарын быһаарыытынан, тус счет арыйтаран, хапытаалынай өрөмүөн харчытын бэйэҕит дьиэҕитигэр уган иһиэххитин сөп. Оччотугар мунньубут харчыгыт атын сиргэ ханна да барбат.
«Өскөтүн салайар хампаанньа тустаах үлэтин толорбот, дьиэҕэ болҕомто уурбат түгэнигэр иниспиэктэрдэр ыйыллыбыт аадырыска тиийэн, бэрэбиэркэ оҥороллор. Үгүс салайар хампаанньалар дьонтон сайаапка киирдэҕинэ биирдэ сүүрэн тиийэн тэстибит турбаны оҥороллор. Дьиҥэр, саахал тахсыан иннинэ, дьиэ туругун күннэтэ көрө-истэ сылдьыахтаахтар. Алдьаммыт түннүк, подъезд аана тымныынан үргүйбэттэрин курдук оҥоһуллуохтаахтар. Күн бүгүн 161 салайар хампаанньа баарыттан 80-на лицензиятын былдьаппыта», — диэн этэр Наталья Чусовская.
Өскөтүн салайар хампаанньа аатыгар киирбит сайаапка туох да хардата суох хааллаҕына, Госстройжилнадзор аатыгар канцелярияҕа сурук илдьэн биэриэххэ, эбэтэр почтанан ыытыахха сөп. ОДьКХ судаарыстыбаннай информационнай ситимин саайтыгар https://dom.gosuslugi.ru/#!/main киирэн, ким баҕалаах сурук хаалларар кыахтаах. Ону таһынан, субсидиянан хайдах туһаныахха сөбүн, салайар хампаанньа лицензиятын бэрэбиэркэлиэххэ син.
Марианна ТЫРТЫКОВА, «Саха сирэ» хаһыат, edersaas.ru