Салайааччылар Маар Күөл, Дьаархан, Арыылаах олохтоохторун кытары көрүстүлэр
Сэтинньи 6 күнүгэр, Сунтаар улууһун Аҕа баһылыгын социальнай уонна имиджевэй бэлиитикэҕэ солбуйааччы Гаврил Еремеев салайааччылаах социальнай эйгэ бэрэстэбиитэллэрин бөлөҕө Маар Күөл, Дьаархан уонна Арыылаах нэһилиэктэринэн үлэлээтэ.
edersaas.ru
Бөлөххө улуус бэтэрээннэрин сэбиэтин бэрэссэдээтэлэ Афанасий Васильев, нэһилиэнньэ социальнай харыстабылын управлениетын салайааччыта Георгий Фролов, улуустааҕы киин балыыһа кылаабынай бырааһа Светлана Иванова, үөрэҕирии информационнай-методическэй отделын салайааччыта Туяра Семенова, Сунтаар улууһугар СӨ биэнсийэ пуондатын сүрүн исписэлииһэ Любовь Саввинова, «Кэскил» реабилитационнай киин психолога Розалия Еремеева, «Сахамедстрах» тэрилтэ сүрүн исписэлииһэ Наталия Потапова, култуура уонна духуобунай сайдыы управлениетын исписэлииһэ Галина Самойлова олохтоохтору кытары көрсөн үлэлэрин, туох саҥа уларыйыылар киирбиттэрин кэпсээтилэр уонна Улуу Кыайыы 75 үбүлүөйдээх сылыгар бэлэмнэнии үлэтэ күүскэ ыытыллыахтааҕын бэлиэтээтилэр.
Олохтоохтор үлэ бэтэрээннэригэр, инбэлииттэргэ көрүллэр чэпчэтиилэри чуолкайдастылар. Маны таһынан, бэйэлэрин туруорсууларын, этиилэрин киллэрдилэр. Мунньахха киирбит этиилэр бары боротокуолланан, боппуруостары быһаарарга хамыыһыйа үлэлиэҕэ. Олохтоохтор бу көрсүһүүнү олуһун биһирээтилэр, инникитин маннык тэрээһиннэр ыытылла туруохтарыгар баҕа санааларын, махталларын эттилэр.
«Сунтаар улууһа (оройуона)» муниципальнай оройуон дьаһалтатын пресс-сулууспата