СӨ Үөрэҕин уонна наукатын министиэристибэтигэр, министиэристибэ иһинэн үлэлиир тэрилтэлэр дириэктэрдэригэр саҥа салайааччыны билиһиннэрдилэр.
Ил Дархан Айсен Николаев муус устар 30 күнүнээҕи ыйааҕынан, үөрэх уонна наука миниистирин эбээһинэһин толорооччунан Михаил Сивцев анаммыта.
Саҥа анаммыт миниистири кэллэктиипкэ СӨ Ил Дарханын уонна Бырабыыталыстыбатын дьаһалтатын салайааччыта Афанасий Владимиров билиһиннэрдэ.
“Михаил Петрович Сивцев салайыахтаах эйгэтэ элбэх өрүттээх уонна өрөспүүбүлүкэҕэ биир инники турар. Үөрэх эйгэтигэр араас саастаах, араас идэлээх элбэх дьон кыттыылаах уларыта тутуулар буолаллар. Саҥалыы таһымнаах салайааччы бэйэтин кыаҕын, билиитин көрдөрөрүгэр уонна төрөөбүт өрөспүүбүлүкэтин туһугар үөрэх суолталаах бырайыактарын олоххо киллэрэригэр эрэллээхпин”, — диэн Афанасий Семенович бэлиэтээтэ.
Саҥа миниистир биэдэмэстибэ үлэтигэр утумнааһыны оннунан хаалларыа диэн эрэнэрин биллэрдэ. Ону тэҥэ, дойду бэрэсидьиэнэ Владимир Путин уонна Ил Дархан Айсен Николаев туруорбут соруктарын толорууга ылсар ирдэнэрин эттэ. Коронавирус тарҕаныытын кэмигэр үөрэх хаамыытын биир сиргэ турарын таһаарбат наадатын ыйда.
Михаил Сивцев өрөспүүбүлүкэ салалтата киниэхэ итэҕэлин, эрэлин иһин махталын биллэрдэ. “Үөрэх систиэмэтэ – көннөрү сайдыы уонна барыларыгар тэҥ кыах. Пандемия биһиги толкуйбутун номнуо уларытта, биһиги ыраахтан олорон (дистанционно) үөрэниигэ, үлэлииргэ көстүбүт. Өрөспүүбүлүкэ, дойду салалтата министиэристибэ иннигэр туруорар суолталаах соруктарын, саҥа усулуобуйаҕа үлэлии үөрүйэх хамаанда быһыытынан салҕыахпыт”, — диэн Михаил Сивцев эттэ.
СӨ Ил Дарханын уонна бырабыыталыстыбатын пресс-сулууспата.
Хаартыска: Мария ВАСИЛЬЕВА (СИА).