Ааспыт кыһын, Бырабыыталыстыба отчуотугар эбээн бытантайдар саха ынаҕын үүтүттэн сыыр оҥорор былааннаахтарын иһитиннэрбиттэрэ.
edersaas.ru
Онуоха анал астыыр тэрил ылыллан, аҕалыллара уонна таҥыллара эрэ хаалла диэн улуус баһылыга Гаврил Горохов эппитэ. Бу күннэргэ Саккырыыр олохтооҕо Августа Старостина саха ынаҕын үүтүттэн сыыр оҥорон дьонун-сэргэтин күндүлээтэ.
— Барыта 35 сүөһүлээхпит, ол иһигэр 11 ынахтаахпыт, – диир Августа Старостина. – Быйыл 10 ынахпыт төрөөн, күҥҥэ 30-40 лиитэрэ үүтү ыыбыт. Нэһилиэнньэҕэ сүөгэй, суорат атыылыыбыт. Саха ынаҕын үүтэ сыалаах буолан, сыыры оҥорорго бэрт табыгастаах эбит. Амтана даҕаны ураты. Ол иһин, интэриниэтинэн үөрэтэн, бу күннэргэ сыыр оҥорон боруобалаатыбыт. Маныаха улууһум улахан көмөнү оҥордо, 300 тыһ. солк. үп көрөн, Новосибирскайтан MAGGIO диэн кыра кыамталаах астыыр тэрили атыыластыбыт. Сыыр «Дьиэтээҕи» диэн көрүҥүн, билиҥҥитэ амсайыыга эрэ диэн оҥордубут. Арыый уопутуран истэххэ, ньыматын таптахпытына, элбэҕи оҥорорго ылсыахпыт.
Старостиннар үс оҕолоох эдэр ыаллар, 2016 сыллаахтан бааһынай хаһаайыстыбатын тэринэн үлэлииллэр.
Раиса Сибирякова, «Саха сирэ» хаһыат, edersaas.ru