Бүгүн Аҕа дойдуну көмүскээччилэр күннэринэн тэрилтэ аайы эр дьону чиэстээһин, кинилэргэ махтал уонна эҕэрдэ тыл бастыҥын аныыллар.
«Сахамедиа» холдинг тэрилтэтигэр 27 эр киһи үлэлиир. Айар кэлэктиипкэ суруналыыстары таһынан, тиэхэньиичэскэй хайысхалаах үлэни барытын эр дьон оҥороллор.
Аҕа Дойдуну көмүскээччилэр бырааһынньыгын көрсө «Сахамедиа» өрөспүүбүлүкэтээҕи медиа-кииҥҥэ идэлээх сойуус тэрийиитинэн суруйар, таҥар, устар үлэлээх кэллиэгэлэрбитин чиэстээтибит.
— Биһиги үлэбитинэн күннэтэ бииргэ алтыһар дьоммут — эһиги.
Дьиэ кэргэттэрбит эр дьонунааҕар эһигини, кэллиэгэлэрбитин, элбэхтэ көрөбүт диэххэ сөп.
Өрүү бүгүҥҥүгүт курдук күлэ-үөрэ сылдьыҥ, үлэҕитигэр эппиэтинэстээх уонна бэриниилээх буолуҥ, — диэн тэрилтэ кылаабынай буҕаалтыра Лена Исакова эҕэрдэтин тиэртэ.
«Сахамедиа» холдинг «тэбэр сүрэҕэ» — өрөспүүбүлүкэтээҕи медиа-киин. Тэрилтэ устар, таҥар тиэхэньиичэскэй үлэлээх эр дьоно бары кэриэтэ — бу салаа үлэһиттэрэ.
— Медиа-кииҥҥэ сүрүннээн эр дьон үлэлииллэриттэн киэн туттабын. Эһиэхэ мин баҕа санаам — ыалдымаҥ, өрүү үлэ-хамнас үрдүгэр, олох үөһүгэр сылдьыҥ, эр дьон аатын үрдүктүк тутуҥ, — диэн бэлиэтээтэ бэйэтин эҕэрдэ тылыгар «Сахамедиа» өрөспүүбүлүкэтээҕи медиа-киин салайааччыта Алена Сергеева.
Үөрүүлээх тэрээһин кэрэхсэбиллээх түгэнинэн Калашников аптамаатын таҥыы буолла. Күрэхтэһии иннинэ саппааска сылдьар ыстаарсай лейтенант Евгений Петров аптамааты таҥыыга маастар кылааһы көрдөрдө. Онтон уолаттар утуу-субуу күрэхтэһиигэ кыттан бардылар. Бииргэ үлэлии сылдьар дьоммут аармыйаҕа сылдьан аат, соло бөҕөлөөх эбиттэр. Ол ону олус сэргии иһиттибит, уолаттарбытын олох атын харахпытынан көрдүбүт.
Өрүү күлэ-үөрэ сылдьар Денис Попов ВДВ-га сулууспалааспыт десантник эбит. Күрэхтэһии түмүгэр 1-кы миэстэҕэ IT-салаатын салайааччыта Гаврил Федоров таҕыста. Киниэхэ тиэрмэс бириис тигистэ.
2-с миэстэҕэ холдинг шеф-эрэдээктэрэ Федор Григорьев таҕыста. Кини араадьыйанан наҕараадаланна.
3-с бочуоттаах миэстэҕэ IT-салаа эппиэттээх үлэһитэ Александр Куприянов тахсан, быһах сытыылыыр бириискэ тигистэ.
Тэрээһини тэрийбит «Сахамедиа» холдинг идэлээх сойууһун салайааччыта Анивера Акимова бырааһынньык сүрүн түһүмэҕин туһунан санаатын бу курдук үллэһиннэ:
— Хас да сыллааҕыта аптамааты таҥыыга, ыһыыга күрэс ыыппыппыт. Ону эр дьоммут олус сэргээбиттэрэ. Онон, бу сырыыга «ыччаттарбыт көрдүннэр-иһиттиннэр» диэн Улуу Кыайыы 75 сылын көрсө бу күрэһи эмиэ ыытарга быһаарынныбыт.
Кэлиҥҥи сылларга аармыйаҕа сулууспалыы барар ыччат аҕыйаата. Үгүстэрэ аптамаат тутан да көрбөтөх буолуохтаах. Бэртээхэй күрэх буолла. Уолаттарбыт көхтөөхтүк кытыннылар.
Оттон күрэхтэһии кыайыылааҕа IT-салаатын салайааччы Гаврил Федоров кыттыытын туһунан бу курдук кэпсээтэ:
— Төһө да 1-кы миэстэни ылларбын, аптамааты таҥмыт түмүкпүттэн астымматым — 53 сөкүүндэ. Аармыйаҕа сылдьан, көрдөрүүм быдан ордук этэ. Мин 2016 -2017 сс. Уссурийскай уобалас Чернышовка сэлиэнньэтигэр мостовой батальон автомобильнай ротатыгар сулууспалаабытым. Автомобильнай взводка отделение хамандыыра этим. Олус истиҥ, дириҥ ис хоһоонноох бырааһынньыгы тэрийбит идэлээх сойууспутугар барҕа махталбын тиэрдэбин. Кэллиэгэлэриҥ ис дууһаларыттан тахсар эҕэрдэлэриттэн күндү суох.
«Сахамедиа» холдинг эр дьонун саха эстрадатын артыыстара кэлэн эҕэрдэлээн, тэрээһини өссө киэргэттилэр, бырааһынньыгы сэргэх тыыннаатылар.
Күндүтүк саныыр кэллиэгэлэрбитин, айар куттаах биир идэлээх эр дьоммутун Аҕа дойдуну көмүскээччилэр күннэринэн истиҥник эҕэрдэлиибит! Айымньылаах үлэҕитигэр ситиһиини баҕарабыт. Дьиэ кэргэттэргит истиҥ эйгэтигэр бигэнэн, өрүү дьол, уйгу, табыллыы аргыстаныҥ!
Елена ПОТОЦКАЯ, «Cаха сирэ» хаһыат, edersaas.ru
Хаартыска, видео — ааптар түһэриитэ уонна устуута.