СахаКВН чаҕылхай оонньуутугар «Чаҕылхайдар» кыайдылар

Ааптар: 
Бөлөххө киир:

«Кулун тутар 13-14 күннэригэр Уус Алдан Кэптэнитигэр сэргэх тэрээhин ааста» диэн олохтоохтор уонна көрөөччүлэр бэлиэтииллэр. Кырдьык, урукку өттүгэр оонньоммотох, хаhааҥҥытааҕар да таhымнаах тэрээһин буолла! Драйв, энергетика, атмосфера, доҕордоhуу, тыҥааhыннаах киирсии…

Бу барыта өрөспүүбүлүкэ биэс төгүллээх чөмпүйүөнүн үрдүк аатын ылбыт «Лөгөй өрүөлчээннэрэ» хамаанда 20 сыллаах үбүлүөйдээх куубагар анаммыт III өрөспүүбүлүкэтээҕи «Саха КВН» оонньууларыгар буолан ааста. Икки күннээх астык оонньуу түмүгүнэн бастыҥнар аатаннылар.

Бастакы миэстэни Амма Е.А. Шишигин аатынан Сатаҕай орто оскуолатын үөрэнээччилэрин «Чаҕылхайдар» хамаандата ылла. Хамаанда оонньуу хас да бирииhин итэҕэтиилээхик ылла. «Күн күлүүк» (Мисс КВН) Нарыйа Судинова, «Бастыҥ куолас» Алина Онуфриева буоллулар. Иккиэн «Чаҕылхайдар» хамаанда бэрэстэбиитэллэрэ. Оттон кинилэр салайааччылара Ольга Николаевна Никитина «Саталлаах салайааччы» үрдүк аатын сүктэ.

«Кылгас кэм иhигэр хамаанда лаппа кыаҕырбыт, арааhа, финалга кыахтаах оонньууну көрдөрөрө буолуо», – диэн дьүүллүүр сүбэ бэрэссэдээтэлэ, Саха Өрөспүүбүлүкэтин «Саха КВН Лигата» ыччат уопсастыбаннай тэрилтэтин салайааччы Геннадий Охлопков санаатын эттэ.

Аммалартан олох аҕыйах баалынан хаалан, иккис миэстэҕэ Горнайтан сылдьар С.И. Тарасов аатынан Өрт орто оскуолатыттан «Солоҕон» хамаандата буолла. Хамаанда полуфиналтан күүстээх оонньууну көрдөрдө. Маны таhынан, элбэх сыллар тухары өйдөнөн хаалар чаҕылхай уобараhы бэлэхтээбит «Солоҕон» хамаанда хапытаана Андрей Пахомов «Көрдөөх көкөт» (Мистер КВН) үрдүк ааты ылыан ылла.

Үhүс миэстэҕэ инникитин лаппа сайдар кыахтаах Ньурба улууhун «Айыы оҕолоро» хамаандата таҕыста. Оҕолор маладьыастар, соторутааҕыта Сунтаарга ыытыллыбыт «Саха КВН» ыччат оонньууларыгар эмиэ үhүс миэстэни ылбыттара. Ол иhин этэн эрдэхтэрэ, ким элбэхтэ үлэлиир — ол элбэҕи ситиhэр. Ньурбаларга инникитин ситиһиилэри баҕарабыт.

Дьүүллүүр сүбэ быһаарыытынан, 1, 2 миэстэни ылбыт хамаандалар бу дьыл муус устар саҥатыгар Дьокуускай куоракка ыытыллар XX-с өрөспүүбүлүкэтээҕи оскуола оҕолорун «Саха КВН» оонньууларын финалыгар кыттыахтара. Кинилэр полуфинал түмүгүнэн эрдэ талыллыбыт тоҕус хамаанданы кытта күөн көрсүөхтэрэ, сүүрбэһис сезон кыайыылааҕын аатын сүгэр иһин илин-кэлин түсүһүөхтэрэ.

Маны таһынан, оонньууну сэргэ «Лөгөй өрүөлчээннэрэ» хамаанда үбүлүөйдээх бенефиһин бар дьонугар бэлэхтээтэ. Хамаанда араас сыллардааҕы выпускниктара түмсэн, урукку сыллар чаҕылхай бырагыраамаларыттан быһа тардан көрүдьүөстэрин көрдөрдүлэр, аатырбыт-сураҕырбыт кэмнэрин ахтан-санаан тыл эттилэр, ырыа ыллаатылар. Бу киэһэ кинилэри доҕотторо, улуус, нэһилиэк, оскуола бэрэстэбиитэллэрэ бэйэлэрин уолаттарын, бастыҥ ыччаттарын чиэстээтилэр.

Тэрийэр бөлөх Саха Өрөспүүбүлүкэтин Ыччат дьыалаларыгар уонна социальнай коммуникацияларга министиэристибэтигэр, Саха Өрөспүүбүлүкэтин Үөрэҕин уонна наукатын министиэристибэтигэр, Уус Алдан уулууһун дьаһалтатыгар көмөлөрүн иһин дириҥ махталын биллэрэр.

СӨ ыччат уонна оҕо
уопсастыбаннай тэрилтэлэригэр тирэх буолар
киин информационнай сулууспата,
төлөпүөн/факс: 42-03-79

+1
0
+1
0
+1
0
+1
0
+1
0
+1
0
+1
0