Өрөспүүбүлүкэҕэ сыл аайы ыытыллар «Sakha Innovation 2021» быыстапка буолуоҕа.
Рационализатор уонна саҥаны оҥорооччу күнүгэр «Якутия» технопаарка СӨ Инновацияҕа, сыыппара сайдыытыгар уонна инфокоммуникация технологиятыгар министиэристибэни кытта сыл ахсын быыстапканы тэрийэн ыытар. Онно саҥа, сонун үлэлэри, наукаҕа ситиһиилэри билиһиннэрэллэр.
Быыстапка бэс ыйын 24-26 күннэригэр куйаар ситиминэн sakhainnovation.ru саайтка ыытыллар.
«Sakha Innovation» бу саҥа, сонун үлэни билиһиннэрии, конкуренциялаһар кыаҕы быһаарыы, үөрүйэҕи атастаһыы былаһааккатынан буолар.
Быыстапка хас да түһүмэҕинэн ыытыллар. Ол курдук, бэс ыйын 24-25 күннэригэр дьыалабыай бырагыраамаҕа лиэксийэлэр, дьүүллэһиилэр уонна маастар-кылаастар ыытыллаллара былааннанар. Бэс ыйын 25 күнүгэр куйаар ситиминэн «Акселератор В8» питч-сиэссийэтэ, сарсыныгар «Idea Pitch» онлайнынан «Акселератор школьных проектов» бырайыактар сиэссийэлэрэ былааннаналлар.
Бэлиэтээн эттэххэ, бу быыстапка 2013 сылтан ыытыллар уонна кытааччыытын ахсаана сыллата элбээн иһэр. Былырыын күөн күрэскэ 30 экспозиция туруоруллубута, ол иһигэр Камчаткаттан уонна Владивостоктан бааллара. Raspberry Pi 3B+ баазатыгар сиэркилэ, Хотугу тымныы сир усулуобуйатыгар NETSU көлө турар сылаас сирэ, тобук быратыаһыгар аныгы оҥоһук, Run With Zippy сүүрэргэ трекер, «Life Tracker» доруобуйа туругун бэрэбиэркэлиир мобильнай сыһыарыы, о.д.а. бааллара. Онлайн-быыстапканы 3 тыһыынчаттан тахса киһи көрбүтэ.
Быйылгы быыстапкаҕа эмиэ ураты, саҥа, сонун, интэриэһинэй технологиялар, бырайыактар күүтэллэр. Маастар-кылаастар болҕомтону тардыахтара.
Куонкурус уонна анал ааттар кыайыылаахтарыгар харчынан сэртипикээттэр, сыаналаах бириистэр спонсордартан уонна «Sakha Innovation 2021» партнердарыттан туттарыллыахтара. Генеральнай спонсор «MyTona» хампаанньа. Быыстапка партнердарынан «Якутия» Технопаарка уонна «Якутск» ИТ паарка резиденнэрэ буолаллар.
Куйаар ситиминэн ыытыллар быыстапканы көрүҥ, ураты үлэлэри, оҥоһуктары, ИТ-салаа бырайыактарын, наукаҕа ситиһиилэри билсиҥ. Быыстапканы быһа көрдөрүү www.sakhainnovation.ru ыытыллар.