РФ бэрэсидьиэнин Уһук Илиҥҥэ боломуочуйалаах бэрэстэбиитэлэ Юрий Трутнев “хотугу таһаҕаһы таһыы” боппуруостарыгар ыыппыт бырабыыталыстыба мунньаҕын кэнниттэн Ил Дархан Айсен Николаев суруналыыстарга бэйэтин санаатын үллэһиннэ:
— Сайыҥҥы навигация кэмигэр өрөспүүбүлүкэҕэ 1 мөлүйүөн 800 тыһыынча туонна араас таһаҕаһы аҕалыахтаахпыт. Уматык, бородуукта, араас табаар, уо.д.а. Биһиги бэс ыйын, от ыйын кэтэспэккэ, сибилиҥҥэттэн үбү-харчыны мунньан, таһаҕаһы тиэйэн барыахтаахпыт. Биллэн турар, кууһунан атыылааччылар сыананы үрдэтиилэригэр, тырааныспарынан тиэйэн аҕалыыга кыһалҕалар бааллар.
Юрий Трутнев федеральнай былаас уорганнарын салайааччылара кыттыылаах мунньаҕын кэмигэр ыыппытыгар махтанабын. Мунньахха уматыгы, чоҕу, ньиэп бородуукталарын аҕалыыттан саҕалаан, муора, тимир суол тырааныспарын үлэтигэр, о.д.а. быһаччы сорудахтары биэртэлээтэ. Бу быйылгы навигацияны уонна “хотугу таһаҕаһы тиэйиини” үрдүк таһымҥа тэрийэргэ улахан оруоллаах быһаарыылар, сорудахтар буолаллар, — диэн кини эттэ.
Ангелина Васильева, “Саха сирэ” хаһыат, edersaas.ru
Хаартыска: sakhagov.ru