Маны аах Тыа хаһаайыстыбата Уопсастыба

Сайылыктарга оҕо аймах саҥата чугдаарар

Бу күннэргэ өрөспүүбүлүкэҕэ бааһынай хаһаайыстыбалар, кээпэрэтииптэр ыанар ынахтарын  сайылыктарыгар таһааран, үрүҥ илгэни үрүлүтэр үгэнигэр сылдьаллар. Халлаан да куйаарда, күөх от да бытыгыраан ыраатта. Оҕо аймах төрөппүттэриттэн хаалсыбыта, самаан сайын дыргыл сыттаах салгынынан сайа тыынан сайылыктарга үөрэ-көтө,көччүйэ сылдьаллар.

Бүлүү улууһун I Күүлэт нэһилиэгэр  баар “I Күүлэт” кэпэрэтиибэ биир бастыҥ үлэлээҕинэн биллэр-көстөр. Самаан сайын саҕаланыыта кэпэрэтиип үлэһиттэрэ дьиэ кэргэттэрин кытта нэһилиэктэн 15 км тэйиччи  сытар сопхуос саҕаттан баар Чачаҥда сайылыкка көһөн, үрүҥ илгэни үрүлүтэллэр.

«Чачаҥда сайылыгар быйыл сайын 240 ыанар ынах таҕыста, маны таһынан, 160 ньирэй. Быйылгы кыстыгы хотоммут саахалланар туруктаах буолан, кыл-мүччү кыстаан таҕыстыбыт, — диэн кэпэрэтиип салайааччыта  Елена Тутукарова  кэпсиир. — Ордук ньирэйдэрбитин Бүлүүгэ, аттынааҕы нэһилиэктэргэ атыылаатыбыт, сороҕун үлэһиттэрбитигэр ииттиҥ диэн босхо түҥэтэлээтибит.  Субай икки фермата эрдэ көспүтэ.  Субай сүөһүгэ аналлаах хотону бэйэбит күүспүтүнэн туттуохтаахпыт.

Сайылык дьиэлэрэ көөбүл хаттыгастаах хаптаһын эркиннээх, салапаан түннүктэрдээх этэ.  Кэпэрэтиип үлэһиттэринэн мас кэртэрэн, сорох матырыйаалын “Байылыат” маҕаһыынтан ылларан, 2014 сыллаахха бастакы дьиэбитин туппуппут. Эһиилигэр икки дьиэни, ол кэнниттэн сэттэни туттаран, күн бүгүн сайылыкпытыгар стеклопакет-түннүктээх 10 дьиэлээхпит.  Аны туран,  былаһаакка тутаммыт оҕо аймах үөрэ-көтө сайылыыр. Сүөһү көрөөччүлэргэ аналлаах дьиэни 2015 сыллаахха туппуппут. Аныгылыы түннүктээх, сылаас муосталаах, дуустаах. Онон билигин үлэһиттэр бары өттүнэн сөптөөх усулуобуйаҕа олорон үлэлииллэр. Оҕолорбут барахсаттар тахсыһаннар сайылыкпыт  оҕо аймах саҥатынан, күлүүтүнэн лаппа сэргэхсийдэ».

 

 

 

0
0
Telegram @edersaas20