Өрөспүүбүлүкэ үрдүнэн 358 сайылык, ол иһигэр 341 ыанньык сайылыга итиэннэ 17 субан сүөһү сайылыга баар.
edersaas.ru
Бу иһиттэн 195 сайылык тэрээһиннээх хаһаайыстыбалар бас билиилэрэ буолар. Барыта 257 сайылыкка электроуот ситимэ баар. Ол иһигэр, 48 сайылык дизель, сэттэ сайылык моногенератор көмөтүнэн уоттаналлар, биэс сайылык күн уотунун үлэлиир батарыайаны туһаналлар.
Саамай элбэх сайылык Амма улууһугар (39), Уус Алдаҥҥа (44), Мэҥэ Хаҥаласка (23), Хаҥаласка (29), Чурапчыга (25), Тааттаҕа (20), Сунтаарга (37), Бүлүүгэ (18), Намҥа (20), хотугу улуустартан Дьааҥыга (10) сайылык баар. Дьэ бу сайылыктарга сайын устатыгар холбоон, 40-50 тыһ. туонна үрдүк хаачыстыбалаах үүт, ол эбэтэр сыллааҕы үүт 25 %-а ыанар.
Быйыл сайылыкка 38,3 тыһ. сүөһү, ол иһигэр 17,5 тыһ. ыанар ынах (ыанньык 27,8 %-а) таһаарыллыаҕа. Олорго 1489 киһи: 696 ыанньыксыт, 140 үүт тутааччы, 230 техник-осеменатор, 65 ньирэй көрөөччү уонна 358 бостуук үлэлиэҕэ. Сорох хаһаайыстыбалар сайылыкка эрдэ тахсыбыттара, сорохтор саҥа тахсан эрэллэр.
Раиса Сибирякова, «Саха сирэ» хаһыат, edersaas.ru.