«Тымныы чыпчаала» кэпэрэтиип иһинэн тэриллэн үлэлиир «Алгыс» кэпэрэтиип сүөһүтүн сайылыкка таһаарда.
edersaas.ru
Кэпэрэтиип сайылыга Дьааҥы куораттан Остуолба нэһилиэгин Ыыстаах учаастагар баар, онно 3,5 көстөөх сири айаннаан, алта сыырдаах хайаны уҥуордаан тиийиллэр. «Алгыстар» урукку сылларга сүөһүлэрин массыынан таһар буоллахтарына, былырыыҥҥыттан бэйэлэрэ илдьэллэр. Быйыл ынахтар сайылыктарын суолун өйдүүр буоланнар, туора-маары барбакка, сайылыктарыгар 8 чааһынан тиийбиттэр. Сүөһүнү үүрүүгэ «Тымныы чыпчаала» кэпэрэтиип үлэһиттэрэ уонна куорат оскуолатын тохсус кылааһын үөрэнээччилэрэ көмөлөстүлэр. Барыта 160 сүөһүнү сайылыкка илтилэр, субаннары эмиэ таһаардылар. Билигин кыстык хотоҥҥо 70 саҥа төрөөбүт ынах уонна ньирэйдэр хааллылар. Олору бэс ыйын 1 күнүгэр массыынанан тиэйэн илдьэр былааннаахтар.
– Кыстык этэҥҥэ ааһан, сүөһүлэр күөххэ үктэннилэр, – диир «Тымпыы чыпчаала» кэпэрэтиип салайааччыта Екатерина Портнягина. – Былырыын кураан буолан от үүммэккэ, Бырабыыталыстыба көмөтүнэн 200 туонна оту Чурапчыттан тиэйтэрдибит. Үп-харчы бытааннык хамсыырын өйдүүр буолан, суоппардар иэс аҕалбыттара, билигин да харчыларын күүтэн олороллор. Ити иһин махталбын тиэрдэбин. Сүрдээх ыарахан ээ, дьоҥҥо иэстээх сылдьар, ону өйдүүр эрэ дьон өйдүүр буоллаҕа.
Кыһыҥҥы суолу баттаһа 100 туонна комбикуорманы, ньирэй аһылыгын уонна битэмиин аҕалтарбыттар. Онон үлэ былаан быһыытынан барар. Уһун кыһын кэнниттэн сүөһүлэр сайылыктарыгар тахсан күөх оту сиэн, көҥүл тыынан, эттэрэ-сииннэрэ дьэ уһуктан эрдэҕэ. Быйыл пиэрмэ үлэһиттэрин сынньатан, сайылыкка Остуолба нэһилиэгин олохтоохторо үлэлии-хамсыы тахсыбыттар. Сайын устата өлгөм үүтү ыыр былааннаахтар диэн улуус дьаһалтата иһитиннэрэр.
Раиса Сибирякова, «Саха сирэ» хаһыат, edersaas.ru