Сайылыкка оскуола миэстэтигэр сылы эргиччи үлэлиир тэпилииссэлэниэхтэрэ, успуорт былаһааккаланыахтара

Ааптар: 
Бөлөххө киир:
Сайылыкка оскуола миэстэтигэр сылы эргиччи үлэлиир тэпилииссэни уонна успуорт былаһааккатын тутуохтара.
Кэбээйи улууһугар Сайылыкка, бастатан, эбии үбүлээһин көрүллүбүтүнэн, биир сылынан эрдэлээн саҥа оскуола тутуллуоҕа. Онон олохтоохтор үөрүүлэрэ улахан, саҥа кыһа дьэндэйэн тахсарын тулуйбакка-тэһийбэккэ күүтэллэр.
Оскуола дириэктэрэ Евгений Эверстов саҥа дьиэҕэ оскуола уонна гимназия  холбоһон бииргэ үлэлиэхтэрин туһунан этэр.
«Тутуу үлэтэ бу сайын саҕаламмыта. Икки биригээдэ үлэлээбитэ. Икки мэндиэмэн каркааһа бэлэм. Билигин шлакоблоктары уурарга атын биригээдэни күүтэбит. 40 кыраадыс тымныы буолуор диэри үлэлиэхтээхтэр.
Биһиги оскуолабыт агрохайысхалаах. Сүөһүлээхпит, куруолуктардаахпыт уонна кууруссалардаахпыт. Ханна тугу сайыннарарга үлэлэһэрбитин номнуо быһааран олоробут. Эргэ дьиэ оннугар сылы эргиччи үлэлиир тэпилииссэлэниэхпитин уонна успуорт былаһааккаланыахпытын баҕарабыт, — диир дириэктэр.
Оҕолор билигин 1972 сыллаахха тутуллубут оскуолаҕа үөрэнэ сылдьаллар. Бу дьиэлэрэ 2016 сыллаахха хаарбаҕынан билиниллибит.
«Бу сэлиэнньэҕэ, Кэбээйи улууһугар бүтүннүүтүгэр устуоруйаҕа киирэр түгэнинэн буолуоҕа. Оҕолорбут ирдэбилгэ эппиэттиир сырдык, тупсаҕай, табыгастаах усулуобуйаҕа үөрэниэхтэрэ. Ис өртө национальнай истииллээх буоларыгар, «Айар уус» хампаанньаны кытары кэпсэтии ыыта сылдьабыт. Биһиги оскуолабыт федеральнай өйөбүлү ылбыта Бырабыыталыстыба дойду хайа да муннугар кыһалҕаны көрөрүн, хонтуруоллуурун туоһутунан буолар», — диир кини.
Суолталаах социальнай эбийиэк «Үөрэх» национальнай бырайыак чэрчитинэн тутуллар.
+1
0
+1
0
+1
0
+1
0
+1
0
+1
0
+1
0