Ас-үөл боппуруоһун быһаарыыга сүөһүттэн ылыллар бородууксуйа суолтата улахан. Онуоха сайылык күөх мэччирэҥэ улахан оруоллаах.
Раиса Сибирякова, “Саха сирэ” хаһыат, Edersaas ru.
Сэбиэскэй былаас саҕана сопхуос сүөһүтэ барыта сайылыкка таһаарыллара, ол түмүгэр үүтү ыаһыҥҥа чыпчаал көрдөрүүлэр ситиһиллибиттэрэ. 1990-с сылларга сопхуостар ыһылланнар, сүөһү ахсаана лаппа аҕыйаабыта, сайылыктар даҕаны наадата суох курдук буолбуттара.
Итинник дьаһаныы сыыһатын өйдөөн, өрөспүүбүлүкэ салалтата 2000 сылтан сайылыктарга болҕомтотун уурар буолбута. Онон, үбүнэн бигэргэммит өйөбүл оҥоһуллан, эргэ сайылыктар сөргүтүллүбүттэрэ, аныгылыы хааччыллыылаах сайылыктар тутуллубуттара, үүт аппараатынан ыанан, сойутуллан баран туттарыллар буолбута.
Билигин өрөспүүбүлүкэ үрдүнэн 390 сайылык, ол иһигэр 357 ыанньык сайылыга, 33 ыччат сүөһүнү уотар сайылык баар. Быйыл бас билии көрүҥүттэн тутулуга суох хаһаайыстыбалар сайылыкка 33 тыһ. 310 сүөһүнү, ити иһигэр 18 тыһ. 256 ыанар ынаҕы таһаарар былааннаахтар. Күн бүгүҥҥү туругунан, сайылыкка 25 тыһ. 714 сүөһү, ол иһигэр 10 тыһ. 810 ыанар ынах, 13 тыһ. 898 ыччат сүөһү таҕыста.
Улуустарынан ылан көрдөххө, аммалар 4 тыһ. 191 сүөһүнү, чурапчылар 3 тыһ. 120 сүөһүнү, мэҥэ хаҥаластар 2 тыһ. 355 сүөһүнү, ньурбалар 2 тыһ. 362 сүөһүнү, хаҥаластар 1 тыһ. 913 сүөһүнү таһаардылар.
Хаартыскаҕа: Хаҥалас улууһун “Бөртө” сылгы собуотун бастыҥ ыанньыксыта Валентина Трофимова.
Раиса Сибирякова, “Саха сирэ” хаһыат, Edersaas ru.