Сайылык – үрүҥ илгэни дэлэтиигэ уонна ньирэйи төлөһүтүүгэ тирэх
Ааспыт нэдиэлэҕэ «Кириэстээх» кэпэрэтиип кылаабынай зоотехнига Августина Трифонованы кытары сайылыктарынан сылдьан, сүөһүлэр уопсай туруктарын көрдүбүт-иһиттибит, бонитировка ыыттыбыт.
edersaas.ru
Бүөр Күөл сайылыгын суола бэркэ оҥоһуллубут. Мэччирэҥ үчүгэй буолан, сүөһүлэр туруктара бэрт. Ыанньыксыттар Анжелина Петрова, Вера Васильева, Егор Иннокентьев, Егор Васильев, Розалия Павлова холбоон 169 ынаҕы ыыллар. Бастыҥ көрдөрүүлээх Анжелина Петрова 25 ынаҕыттан сайыҥҥы үс ый устата 12 туонна үүтү ыан туттарбыт. Үүтү астыыр пууҥҥа урукку сыллартан Гоголева Татьяна үлэлиир, Павлова Ульяна осеменатордыыр. Спиридонов Петр ньирэй көрөр.
— Петр ханнык баҕарар үлэҕэ эппиэтинэстээхтик сыһыаннаһар. Ону үлэтин түмүгэ кэрэһилиир: көрөр 97 ньирэйин хас биирдиилэрин сууккатааҕы эбиллиитэ — бэс ыйыгар 740 грамм, от ыйыгар 690 грамм, атырдьах ыйыгар 1009 грамм буолла, — диир сүрүн зоотехник.
Күкэһэйгэ 248 ыанар ынаҕы сэттэ ыанныксыт ыан сайылаабыт. Бастыҥ көрдөрүүлээх Февралина Кондратьева ынаҕын ахсыттан 2 тыһ. киилэ үүтү ыыр, сайыҥҥы үс ыйга 23 туонна үүтү туттарбыт. Бэтэрээн ыанньыксыт Галина Васильеваҕа сайын көмөлөспүт сиэннэрэ үөрэх дьыла саҕаланан, бөһүөлэккэ киирбиттэр. Артем Бабкин ньирэй көрөрүн быыһыгар ыанньыксыттыыр. Кини салалтатынан агрошкола онус кылааһын үөрэнээччилэрэ Юлиана Кондратьева, Кэскилээнэ Яковлева сайын ньирэй көрүүтүгэр бэркэ үлэлээбиттэр. (Сүөһүгэ сыстаҕас ыччаттар баалларыттан киһи үөрэр).
Бордоҥ сайылыгар 181 ынаҕы алта ыанньыксыт ыыр. Үлэ Дьоруойа Владимир Африканович Михайлов кэргэнэ Елизавета Петровналыын алта уонча ынаҕы ыыллар. Африканович ынаҕын ахсыттан 3,2 тыһ. лиитирэни ыыр. Сайыҥҥы үс ыйга 50 тонна 600 киилэ үүтү ыан туттарбыт. Биир идэлээхтэрэ Никитина Евдокия, Максимова Валентина, Николаева Татьяна кинилэртэн хаалсыбат туһугар үлэлииллэр. Хайа да сайылыкка осеменатордар былааны 100% толорорго дьулуһан үлэлииллэрэ итиэннэ үүтү тутар пууннар ыраастара, барыта уурбут-туппут курдуктара киһини астыннарар. Чахчыта даҕаны маннык үтүө үлэһиттэрдээх буолан, «Кириэстээх» кэпэрэтиип сайын устата 1 тыһ. 288 туонна үүтү туттарбыт, ньирэйдэр сууккаҕа 600 грамтан биир киилэҕэ тиийэ эбиллэн, төлөһүйэллэрин ситиспит.
Сунтаартан Борис Потапов «Саха сирэ» edersaas.ru сайтка анаан.