Сайылык күнүн бэлэхтээбиккитигэр махтанабыт!

Ааптар: 
Бөлөххө киир:

Ыам ыйын 22 күнүгэр Тыа хаһаайыстыбатын министиэристибэтэ уонна “Туймаада” ҮХАПК бастакы өрөспүүбүлүкэтээҕи Сайылык күнүн Хаҥалас улууһун II Малдьаҕар нэһилиэгэр, Улахан Аан сиригэр-уотугар тэрийдилэр.

edersaas.ru

Сайылык күнэ бэрт тэрээһиннээхтик, үрдүк таһымнаахтык буолан ааста. “Туймаада ҮХАПК иһинэн үлэлиир хаһаайыстыбалар: “Бөртө” сылгы собуота”, “Нөмүгү” агрофирма”, “Хатастааҕы сибиинньэ комплекса”, “Өлүөхүмэ кыладабыайа” хааччахтаммыт эппиэтинэстээх уопсастыбалар уонна “Сайсары” Бааһынай ырыынага” аахсыйалаах уопсастыба үлэһиттэрэ мустаммыт бу күнү сахалыы сиэринэн ыһыах ыһан бэлиэтээтибит.

Сиэрин-туомун толору тутуһан, өйдөбүнньүк сэргэни туруордубут, түһүлгэлэри көрүү итиэннэ илии-атах оонньууларын күрэхтэһиилэригэр көхтөөхтүк кыттан, кэпсэтэн-ипсэтэн, ыллаан-туойан, дуоһуйа сынньанныбыт. Итиэннэ төрүт дьарыкпытын, ынах сүөһүнү уонна сылгыны иитиини, олох саҥа ирдэбиллэригэр сөп түбэһиннэрэн сайыннарарга, эти-үүтү оҥоруу тэтимин үрдэтэргэ, ыччаттарбыт дойдуларыгар олохсуйан үлэлииллэригэр-хамсыылларыгар сөптөөх усулуобуйаны тэрийэргэ сыал-сорук туруорунан тарҕастыбыт.

Онон, өбүгэбит үгэстэрин сөргүтэн, Сайылык күнүн олохтообут Ил Дархан Айсен Николаевка итиэннэ Тыа хаһаайыстыбатын миниистиригэр Александр Атласовка, “Туймаада” ҮХАПК генеральнай дириэктэрэ Петр Семенович Ефремовка барыбытын түмэн, түһүлгэҕэ анал тутуулары оҥорторон, бастыҥ ыанньыксыттары, бостууктары уо.д.а. чиэстээн-бочуоттаан, тыа сирин боростуой үлэһит дьонугар Сайылык күнүн бэлэхтээбиттэрин иһин “Бөртө” хаһаайыстыба кэлэктиибин  аатыттан дириҥ махталбын тиэрдэбин! Биир идэлээхтэрбитин, тыа хаһаайыстыбатын үлэһит дьонун Сайылык күнүнэн өссө төгүл эҕэрдэлээн туран, самаан сайыммыт быйаҥыттан сомсон, үрүҥ Илгэни үрүйэлии сүүрдүөҕүҥ, үтүө баҕа санааларбыт олоххо киирдиннэр, бэйэҕит уонна дьиэ кэргэттэргит чэгиэн-чэбдик буоллуннар диэн алгыспын аныыбын!

Истиҥ эҕэрдэни кытары
Ульяна Степановна Семенова, Хаҥалас улууһун “Бөртө” сылгы собуота” ХЭУо биригэдьиир-зоотехнига, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0