Маны аах Уопсастыба

Сайылык күнүгэр — куйаар ситиминэн тэрээһиннэр

Ил Дархан Айсен Николаев 2018 сыл сэтинньи 6 күнүгэр өрөспүүбүлүкэҕэ ыам ыйын 22 күнүгэр Сайылык күнүн бэлиэтиир туһунан ыйааҕы таһаарбыта.

Бу уураахха олоҕуран, тыа сиригэр саҥа тэтимҥэ култуура үлэһиттэрэ ыытар үлэлэрин саҥалыы тыыннаабыттара кэрэхсэбиллээх. Бу туһунан Ньурба Чуукаарыттан уопсастыбаннай кэрэспэдьиэммит Сэргэн Лэкээрин бу курдук иһитиннэрэр:

«Өбүгэлэрбит айылҕа хаамыытын кэтээн көрөн, самаан сайын сатыылаан кэлэр күнүн бэрткэ да билэллэр эбит. Тоҕус ый томороон тымныылаах кырыа кыһын бүппүтүн кэннэ үкэр куйаас күҥҥэ үктэнэн, Үрдүкү Айыыларга махтанан, өлгөм үүнүүлээх дьыл буоллун диэн көрдөһөллөрө-ааттаһаллара.

Бу үтүө үгэһи төрүт былыргыттан умнубакка Саха омук илдьэ кэлбиппит кэрэхсэбиллээх. Өрөспүүбүлүкэ уус-уран салайааччыларын сүбэтин иһинэн Е.М.Поликарпов аатынан “Эйгэ” норуот айымньытын дьиэтин көҕүлээһининэн Ньурба Маалыкайа, Горнай Солоҕоно, Нам Салбана, Хаҥалас Төхтүрэ кыттыылаах “Үрүҥ илгэ алгыһа”, “Иэйэхсиккэ сүгүрүйүү”, “Айылҕаҕа сүгүрүйүү”, “Салама баайыыта” тэрээһиннэри ыытыыга сиэри-туому оҥорууга инстаграм нөҥүө быһа эпиири ыытыахтара. Маны сэргэ, Ырыа күнүн чэрчитинэн “Харалдьык ырыалара” диэн аһаҕас халлаан анныгар сахалыы ырыалары ыллаан дьиэрэтии куонкуруһа эмиэ куйаар ситимин нөҥүө ыытыллыаҕа. (Лэкээрин Сэргэн Ил инстраграмыгар ыытыллар).

Онон күндү Сахабыт сирин олохтоохторо, ыччаттар, бары сиир ситимҥэ киирэн, улуу Эбэлэрбит иччилэригэр сүгүрүйэн арчыланыахха, саха буолан сандаарыахха, киһи буолан килбэйиэххэ диэн ыҥырабыт!».

Ити курдук, сыстыганнаах дьаҥ кэмигэр дьиэҕэ олоруу эрэсиимигэр бэртээхэй тэрээһин куйаар ситиминэн буолуоҕа. Көхтөөхтүк кыттыҥ, иллэҥ кэми туһалаахтык атаарыҥ.

Елена ПОТОЦКАЯ, «Саха сирэ» хаһыат, edersaas.ru

1
0