Тыа хаһаайыстыбатын министиэристибэтин чахчытынан, сүөһү кыстыга санаа курдук этэҥҥэ ааста.
Ас-үөл тиийдэ, ынах сүөһүгэ да, сылгыга да улахан сүтүк тахсыбата. Төрүөх даҕаны куһаҕана суох түмүктэнэригэр эрэниэххэ сөп. Билигин хаһаайыстыбалар сайылыкка тахсан эрэллэр.
“Бөртө” сылгы собуота” сүөһүлэрин сайылыкка таһаарда
Ыһыыга бэлэмнэнии үлэтэ күүскэ ыытыллар. Быйыл ыһыы былырыыҥҥы курдук, 48,7 тыһ. гектар бааһынаҕа ыытыллыа. Ол иһигэр, бурдук 10,3 тыһ. гектарга, сүөһү сиир култуурата 28,8 тыһ. гектарга ыһыллыа, хортуоппуй 7,7 тыһ. гектарга, аһаҕас сиргэ үүнэр оҕуруот аһа 2 тыһ. гектарга олордуллуо. Ыһыы үлэтин тэрийиигэ бүддьүөттэн 349,9 мөл. солкуобай көрүллэн, тустаахтарга тиэрдиллэ сылдьар.
Хаһаайыстыбалар ыһыы сиэмэтинэн уонна минеральнай уоҕурдуунан сүрүннээн хааччылыннылар. Билигин сиик саптарыыта ыытылла сылдьар. Айылҕа хаппырыыһынан кыра хойутааһын баар эрээри, хаһаайыстыбалар ыһыыны кэмин куоттарбакка, тэрээһиннээхтик итиэннэ агротехнология ирдэбиллэрин тутуһан тэрийэр сыалы-соругу туруорунан үлэлии-хамсыы сылдьаллар.
Раиса Сибирякова, «Саха сирэ» хаһыат, edersaas.ru.