Интэриэһинэй Уопсастыба

Сайыҥҥы сынньалаҥы хайдах тэрийэр туһунан кэпсэттилэр

Оҕолор уонна ыччаттар сайыҥҥы сынньалаҥнарын тэрийиигэ вебинар ыытылынна.

Оҕолор уопсастыбаннай түмсүүлэрин холбоһуга уонна «Сосновый бор» оҕолор сынньанар уонна доруобуйаларын чэбдигирдэр кииннэрэ ZOOM былаһааккаҕа сайыҥҥы сынньалаҥы тэрийэр эппиэтинэстээхтэргэ сэминээр тэрийдилэр.
Холбоһук бэрэссэдээтэлэ Геннадий Охлопков бэлэмнэнии үлэҕэ тохтоото, болҕомтону тардарга үүнэр көлүөнэ интэриэһин уонна да атын сонун ньыманы учуоттууру ыйда. Итиннэ сигэнэн, оҕолор уопсастыбаннай түмсүүлэрин холбоһуга сэргэх, хатыламмат ураты, интэриэһинэй, умсугутуулаах сынньалаҥы тэрийэргэ туһуламмыт «Дворовый вожатый»  бырагырааманы олоххо киллэриитин үөрүйэҕин холобурдаата.
Салгыы улуустартан кэллиэгэлэрэ үлэлэрин сырдаттылар. Бүлүү улууһуттан «Бүлүү кэскилэ» түмсүү  кылгас болдьохтоох «Академия лидеров» симиэнэни ситиһиилээхтик үлэлэппитэ. Манна орто уонна үрдүкү кылаас үөрэнээччилэриттэн тэрийэр хамаандалары оҥорон таһаарарга үлэлэспиттэрэ. Анна Харлампьева уонна Таисия Томская үлэлэрин матырыйаалларын сырдаттылар. «Окрыленные мечтой» оҕолор педагогическай этэрээттэрин салайар, «Сайдыс» улуустааҕы стационарнай лааҕыр начаалынньыга Айна Попова үлэтин үөрүйэҕэр тирэҕирэн, лааҕырга иитэр, такайар, сайыннарар бырагырааманы хайдах бырайыактыырга санаатын үллэһиннэ.
Спикер каадырдары бэлэмнээһиҥҥэ уонна аҥаардас сайын эрэ буолбакка, үөрэҕи таһынан, каникулга сынньалаҥы тэрийии туһунан кэпсэтиигэ, сылы эргиччи үлэлиир киэпкэ көһүүгэ болҕомтону туһаайда.
Сэминээр бүтүүтүгэр оҕолор уопсастыбаннй түмсүүлэрин холбоһугун бэрэссэдээтэлин солбуйааччы, «СӨ педагогическай этэрээттэрэ» ыччат уопсастыбаннай хамсааһынын координатора Екатерина Чинякина тэйиччиттэн олорон оонньуулары тэрийэн ыытыы ньымаларын билиһиннэрдэ. Вебинар кыттыылаахтара маны олус сэҥээрдилэр.
Түмүккэ маннык вебинары өссө тэрийэргэ, үөрүйэҕи WhatsApp көмөтүнэн атастаһа олорорго эппиэтинэстээхтэри таларга, маассабай оонньуулары онлайн киэбинэн хайдах ыытарга видеороликтары устарга эттилэр.
Оҕо уопсастыбаннай түмсүүтүн холбоһугун пресс-киинэ
0
0