Сайыҥҥы сынньалаҥы хаһааҥҥыттан саҕалыырга министиэристибэ бэйэтин көрүүтүн эппитэ
РФ Үөрэҕириигэ миниистирэ Сергей Кравцов соторутааҕыта эрэгийиэн үөрэххэ салайааччыларын кытта мунньахтыырыгар, сайыҥҥы сынньалаҥ туһунан министиэристибэ сүбэтин эппитэ.
Ордук эксээмэнэ суох кылаастар төрөппүттэрэ сайыҥҥы сынньалаҥы хаһааҥҥытааҕар даҕаны күүтэллэр. Ити биир үксүн оҕолор ыраахтан олорон (дистанционно) үөрэниилэрин итиэннэ ханна даҕаны тэлэһийбэккэ дьиэлэригэр олорууларыттан тутулуктаах буолуон сөп.
Дьон араас санааны этэр. Оттон министиэристибэ сүбэ суругар (рекомендация) туох диэн этиллэрий? Тустаах сурукка дойду хас биирдии субъега үөрэх дьылын хаһан түмүктүүрүн туһунан быһаарыныыны бэйэтэ ылынар диэн ис хоһоонноох.
Уопсай сүбэ быһыытынан, 1-8 кылаастарга үөрэҕи ыам ыйын 15-16 күннэригэр (үөрэх нэдиэлэтин уһунуттан көрөн) тохтотуоххутун сөп диэн ыйыллар. Маныаха ыам ыйын 15-25 күннэригэр уруогу таһынан үлэ, уопсай сайыннарар эбии үөрэхтээһин, ону тэҥэ иитии бырагыраамаларынан өйүүр ирдэнэр диэн ыйыллар.
Онтон 10-с кылаастар үөрэхтэрин ыам ыйын 29-30 күннэригэр түмүктүөххүтүн сөп диэн суруллар.
Эксээмэннээх 9-с уонна 11-с кылаас үөрэнээччилэригэр үөрэҕи бэс ыйын 5 күнүгэр диэри түмүктүүргэ этэллэр. Онон оҕолору сайыҥҥы сынньалаҥҥа хаһааҥҥыттан ыытарын эрэгийиэн бэйэтэ эрэ быһаарар.
Сорохтор “традиционнай” үөрэх хаалар үһү диэн сураҕы тарҕаталлар. Тустаах боппуруоска миниистир Сергей Кравцов дойду оскуолалара уонна кэллиэстэрэ дьиэҕэ олоруу (самоизоляция) түмүктэммитин кэнниттэн үөрэх тэрилтэлэригэр миэстэтигэр тиийэн үөрэниилэрэ сөргүтүллүөҕэ диэн хоруйдуур. Онон “оҕолор букатын дистанционнай үөрэххэ көспүттэр үһү” диэн этии сымыйа сурах буолар.
Манна даҕатан эттэххэ, Рособрнадзор салайааччытын эбээһинэһин толорооччу Анзор Музаев биир кэлим эксээмэн (ЕГЭ) көһөрө дуу, көспөтө дуу ыам ыйынааҕы өрөбүллэр кэннилэриттэн быһаарыллыаҕа диэн иһитиннэрбитэ. Тустаах эксээмэн эпидемиологическай балаһыанньаттан быһаччы тутулуктаах.
Людмила ПОПОВА, edersaas.ru
Хаартыска: istockphoto