Сайыҥҥы лааҕырдар үлэлээтилэр!

Ааптар: 
Бөлөххө киир:

Ааспыт нэдиэлэттэн өрөспүүбүлүкэ сайыҥҥы лааҕырдара үлэлэрин саҕалаатылар. Лааҕырга кэшбек диэн тугуй? Лааҕырга “нолуок вычетын” ылыахха сөп дуо? Оҕолор анаалыс туттараллара булгуччулаах дуо? Бүгүҥҥү нүөмэрбитигэр бу ыйытыылары чопчулуохпут.

edersaas.ru

 

Лааҕыр-2021

Оҕо сынньалаҥын, доруобуйатын бөҕөргөтүүтүн тэрийиигэ эрэгийиэннээҕи оператор “Бэс Чагда” оҕо сынньалаҥын уонна доруобуйатын бөҕөргөтөр киин дириэктэрэ Яна Иванова иһитиннэрбитинэн, Саха сиригэр билиҥҥитэ, уопсайа, 187 күннээҕи лааҕыр аһыллыбыт. Быйыл барыта 573 лааҕыры үлэлэтэр былааннаахтар. Мантан улахан аҥаара – күннээҕи. “Лааҕыр реестрэ ыам ыйын 1 күнүгэр диэри бигэргэнэр. Реестргэ бары ирдэбилгэ эппиэттиир санитарнай-эпидемиологическай, куттал суох буолуутун хааччыйар, баһаартан сэрэхтээх буолууга түмүктээх, о.д.а. лааҕырдар хапсаллар. Реестргэ хапсыбатах лааҕырдар үлэлиир бырааптара суох”, — диэн салайааччы быһаарда.

Төһө элбэх оҕо?

Оҕо сынньалаҥын, доруобуйатын бөҕөргөтүүтүн тэрийиигэ эрэгийиэннээҕи оператор иһитиннэрбитинэн, өрөспүүбүлүкэҕэ бэс ыйын 5 күнүттэн оскуола атты­нааҕы күннээҕи лааҕырдар, бэс ыйын 15 күнүттэн улууска дьаҥ туругуттан көрөн куорат таһынааҕы уонна атын лааҕырдар аһыллаллар. Онон бастакы симиэнэҕэ, уопсайа, 296 лааҕырга 12 тыһыынчаттан тахса оҕону хабар былааннаахтар. Саха сирин улуустарыгар билиҥҥитэ 187 күннээҕи лааҕыр аһыллыбыт. Дьокуускай куоракка эпидемиологическай балаһыанньанан сибээстээн, Роспотребнадзор сүбэтинэн бүгүҥҥү күҥҥэ күннээҕи (дневной) лааҕырдар үлэлэрэ көҥүллэммэт. Куорат таһынааҕы хонуктаах лааҕырдар, бары санитарнай ирдэбили тутуһан бэс ыйын 15 күнүттэн үлэлиэхтэрэ диэн этэллэр.

Ону таһынан, Саха сирин оҕолоро сыллата өрөспүүбүлүкэ тас өттүнээҕи лааҕырдарга сынньанан элбэҕи билэн-көрөн кэлэллэр. Ол курдук, быйыл Краснодарскай кыраай, Приморскай кыраай лааҕырдарыгар босхо путевканан сынньаныахтара, айанын төлөбүрүн төрөппүттэр бэйэлэрэ уйуналлар. Маныаха анаан СӨ Үөрэҕин уонна наукатын минис­тиэристибэтэ чэпчэтиилээх (субсидия) билиэттэри сакаастаспыт. Бу – төрөппүттэргэ улахан көмө. Итини таһынан, “Океан”, “Смена”, “Орленок” Бүтүн Арассыыйатааҕы, “Артек” норуоттар икки ардыларынааҕы оҕо кииннэригэр, о.д.а. эрэгийиэннээҕи кубуоталар бааллар.

Саха сирин тас өттүгэр сынньана барар оҕолорго СӨ Тырааныспарын министиэристибэтэ “күөх көрүдүөрү” (“зеленый коридор”) олохтуур. Ол эбэтэр, оҕолорго куттала суох уонна табыгастаах буоларын туһугар бэлиэтэниини (регистрация) туспа аһараллар, сөмөлүөккэ бастакынан киллэрэллэр, о.д.а.

Лааҕыр баазатын бөҕөргөтүү

Бу иннинээҕи сылларга лааҕырдар өрөмүөннэммэтэхтэрэ ыраатта, үп көрүллүбэт диэн муҥатыйаллар этэ. Быйыл бүддьүөттэн 50 мөлүйүөн солкуобай үп материальнай-тиэхиньиическэй баазаны хаҥатыыга бэриллэр буолбут. Куонкурус түмүгэр 11 улуустан, Дьокуускай куораттан уонна Жатайтан 15 баазаны талбыттар. Итинтэн 11 лааҕыр улуустан, 3 лааҕыр Дьокуускай куораттан, 1 лааҕыр Жатайтан киирбиттэр.

Саҥа сүүрээн 

Аны быйылгы сылтан лааҕырдарга сыһыаннаах саҥа сүүрээннэри ыйдахха, бастакытынан, путевка электроннай көрүҥүнэн эрэ бэриллэр. Ыам ыйын 25 күнүттэн АИС «Е-услуги. Образование» портал нөҥүө барар. Төрөппүт порталга киирэн бэйэтэ лааҕыры талан сайаапка ыытар итиэннэ хоруйун тутар.

Иккиһинэн, 2021 сылтан лааҕырга кэшбек көрүллэр. Онно олоҕуран, төрөппүт лааҕырга путевка төлөбүрүн 50 бырыһыанын төнүннэрэр кыахтаах, ол эрээри, 20 тыһыынча солкуобайтан элбэҕи буолбатах.

Үсүһүнэн, лааҕырга “нолуок вычетын” төнүннэриэн сөп.

 

Кэшбек уонна “нолуокка вычет”

РФ Бырабыыталыстыбатын сорудаҕынан Ростуризм туристическай кэшбеккэ ханыылыы бырагырааманы бэлэмнээбит. Төрөппүттэр бырагыраамаҕа киирбит хонуктаах (стационарнай) лааҕыр сайыҥҥы симиэнэтигэр путевка атыылаһан баран, төлөөбүт суумаларыттан 50 бырыһыанын (20 тыһыынча солкуобайга диэри) төнүннэрэр кыахтаахтар. Манна хонуктаах (стационарнай) лааҕырдар эрэ хапсаллар. Бырагыраама ыам ыйын 25 күнүттэн атырдьах ыйын 25 күнүгэр диэри үлэлиир. Харчылара, төлөбүрү оҥорбут “Мир” каарталарыгар 5 күн иһинэн төннөр. Бырагыраама Мирпутешествий.РФ. федеральнай саайт нөҥүө үлэлиир. Саха сириттэн кэшбеккэ федеральнай реестргэ билиҥҥитэ 12 лааҕыры бигэргэппиттэр: “Сосновый Бор”, “Бинго”, “Кэскил”, “Родничок”, “Каландаришвили”, “Спутник”, “Чэбдик”, “Радуга”, “Берег дружбы” (Алдан улууһа), “Алмаз” (Ленскэй улууһа), “Мандар кыһата” (Таатта улууһа) уонна “Усадьба Булуус” (Хаҥалас улууһа). Толору испииһэги ыйыллыбыт саайтка көрүөххэ сөп.

Итини таһынан, лааҕырга төлөбүртэн “нолуок вычетын” төнүннэриэххэ сөп. Инньэ гынан, кэшбектан 50 бырыһыан уонна “нолуок вычетын” туһанан төрөппүт лааҕыр төлөбүрүттэн балачча сууманы төнүннэрэр кыахтанна. Бу билиҥҥи кэмҥэ төрөппүккэ улахан өйөбүл буолар.

Туох ирдэбил?

Коронавирус дьаҥынан сибээстээн, иккис сылын лааҕыр үлэтигэр кэккэ уларыйыылар киирбиттэр. Ол курдук, бастатан туран, лааҕырдарга оскуолаларга курдук харыстанар, дезинфекциялыыр сириэстибэлэр, рециркулятордар баар буолуохтаахтар, күннэтэ кыраадыстарын кэмниэхтээхтэр.

Иккиһинэн, лааҕырга ким эмэ коронавируһунан ыалдьар түгэнигэр, хамсаныы барыта эрдэттэн ыйыллыбыт дьаһалынан (алгоритм) барыахтаах.

Үсүһүнэн, остуоллар, ороннор тэйиччи туруохтаахтар.

Төрдүһүнэн, үлэһиттэр коронавируска анаалыстара үс күн иһинэн буолуохтаах. Асчыттарга баар урукку ирдэбиллэр оннунан хаалбыттар.

Бэсиһинэн, лааҕыр толору суоттаммыт кыаҕыттан, оҕо ахсаана 75 бырыһыанын эрэ толоруохтаах.

Алтыһынан, кулун тутартан балааккалаах (палаточные) лаа­ҕырдар эрэгийиэннээҕи суһал ыстаап көҥүлүнэн эрэ аһыллар кыахтаахтар.

Сэттиһинэн, “Бэс Чагда”, “Энергетик”, “Чэбдик”, “Каландарашвили”, «Радуга» курдук о.д.а. куорат таһынааҕы лааҕырдар Арассыыйаҕа бары икки схеманан үлэлиир буолбуттар. Ол курдук, бастакытынан, үлэһиттэр, оҕолор бары биир күҥҥэ киирэллэр итиэннэ 21 күн устата лааҕыртан тахсыбаттар. Симиэнэ устата лааҕырга ким да киирбэт-тахсыбат. Маныаха ирдэнэрин курдук үлэһиттэр коронавирустан быһыыны ылбыт уонна саҥа оҥоһуллубут анаалыстаах буолуохтаахтар. Оҕолор ПЦР анаалыһы туттарбаттар эрээри, Дьокуускай куорат лааҕырыгар сынньанааччылартан ПЦР анаалыһа булгуччу ирдэнэр. Дьокуускай куоракка лааҕырга киирэр оҕолорго тустаах анаалыс босхо диэн тустаах исписэлиистэр быһаардылар. Иккиһинэн, оҕолор бары бииргэ (одномоментный заезд) киирэллэр, онтон үлэһиттэр дьиэлэриттэн сылдьан үлэ­лиэхтэрин сөп. Бу түгэҥҥэ үлэһиттэр нэдиэлэ ахсын ПЦР анаалыс туттарыахтаахтар. Ол гынан баран, Саха сирэ бастакы схеманы талбыт. Онон үлэһиттэр, оҕолор бары биир кэмҥэ киирэллэр итиэннэ 21 күн устата лааҕырга киирии-тахсыы бобуллар.

Ити курдук, төһө даҕаны эпидемиологическай балаһыанньанан уларыйыылар киирдэллэр, ирдэбиллэр күүһүрэллэр, оҕо сайыҥҥы сынньалаҥын тэрийиигэ күүстээх үлэ барар. Ааспыт сылга тэҥнээтэххэ, хас даҕаны бүк элбэх лааҕыр үлэлиир.

Людмила ПОПОВА, “Саха сирэ” хаһыат, edersaas.ru

Хаарытска: https://ysia.ru/bolee-7-mln-rublej-potratyat-na-ukreplenie-bazy-letnego-lagerya-usadba-buluus-v-hangalasskom-rajone/

+1
0
+1
0
+1
0
+1
0
+1
0
+1
0
+1
0