“Сайсары” бааһынай ырыынагар Саҥа дьыллааҕы остуолу киэргэтэр тоҥ сибиэһэй балык билигин хоту улуустартан үгэннээн кэлэ турар. Бу кэми баттаһа “Сайсары” ырыынак итиэннэ Тыа хаһаайыстыбатын уонна аска-үөлгэ министиэристибэтэ тэрийиилэринэн “Көмүс хатырык” балык дьаарбаҥката хас сыл аайы ыытыллар. Быйыл даҕаны бу үгэстэн туораабакка, ырыынак ахсынньы 24 күнүгэр куорат олохтоохторун уонна ыалдьыттарын тоҥ балык бырааһынньыгар түмтэ.
Быйылгы дьаарбаҥканы ыыппыт Александр Максимов-Һааска уол сэргэх кэпсээнэ, көрө-нара ахсынньы аам-даам тымныытын кытта мүлүрүтэргэ дылы гынна. Дьыбардаах салгыны эдэрдии эрчимнээх ырыаларынан доргуппут Айгылаан, Сандал, Ваня Потапов дьон-сэргэ күүстээх ытыс тыаһынан бэлиэтэннилэр. Көрөөччүлэр кинилэри кытта тэҥҥэ үҥкүүлэһэн ыллылар.
Балык бырааһынньыгын кыттыылаахтарыгар анаан элбэх күрэхтэһии тэрилиннэ. Александр Попов-Лаачаан оонньууларыгар кыттыбыттар ис, хаан, балык бириистэри туттулар. Сыалыһар, муксуун, Кэбээйи соболоро кытта оонньоннулар. Уонна, биллэн туран, саамай элбэх көрөөччүнү тардар тоҥ балыгы кыһыыга күрэхтэһии, хаһан да буоларын курдук, олус тыҥааһыннаахтык ааста. Кыайыылаахха пылесос туттарылынна. Иккис, үһүс миэстэни ылбыттар электромясорубка уонна блендер бириистэри туттулар. Тымныыны, туманы аахсыбакка, дьаарбаҥка тэрээһиннэригэр көхтөөтүк кыттыбыттар дьиэлэригэр илии тутуурдаах, өттүк харалаах тиийэн дьоннорун соһуппуттара, үөрдүбүттэрэ чахчы.
“Сайсары” ырыынакка тэриллибит “Көмүс хатырык” балык бырааһынньыга манна сылдьыбыт хас биирдии киһи сүргэтин көтөхтө, көхтөөх уонна көрдөөх дьону ханнык да тымныы чаҕыппатын өссө биирдэ көрдөрдө. Бу күн атыы-тутуу эмиэ көхтөөхтүк барда. Саха киһитин маанылаах остуолун бочуоттаах миэстэлэригэр туруохтаах ас-үөл хото атыыланна.
Татьяна ПАВЛОВА, «Саха сирэ» хаһыат, edersaas.ru