Сайсары уокуругар саҥа сылаас тохтобул баар буолла

Ааптар: 
Бөлөххө киир:

Бу күннэргэ Дьокуускай куорат төрүттэммитэ 390 сылыгар анаан сылаас тохтобуллары үөрүүлээх быһыыга-майгыга арыйыы сиэрэ-туома буола турар.

Бүгүн Сайсары уокуругар «3-с Борисовка» сылаас тохтобул арылынна.  Олохтоохтору саҥа сылаас тохтобулунан куорат баһылыгын солбуйааччы Антон Алексеенко, Дьокуускай Дууматын бэрэссэдээтэлэ  Альберт Семенов, «Главстрой» МКУ салайааччыта Алексей Варламов, «ЯПАК» МУП-тан Валерий Домотов эҕэрдэлээтилэр.

Тохтобул Бүлүүлүүр суол 5 км турар.  Бэйэтин эҕэрдэ тылыгар Антон Алексеенко Саха АССР тэриллибитэ 100, Дьокуускай куорат төрүттэммитэ 390 сылларыгар анаан уопсастыбаннай тырааныспар сайдыытыгар улахан үлэ ыытыллыбытын бэлиэтээтэ: суолталаах үбүлүөйдэри көрсө 100 саҥа оптуобустар кэлбиттэрэ,  20 сылаас тохтобул оҥоһуллан үлэлии турар, быйыл маннык уонча тохтобул эбии аһыллыаҕа.

Сылаас тохтобуллары урбаанньыт Афанасий Ефремов тутар эбит. Киниэхэ Дьокуускай Дууматын бэрэссэдээтэлэ Альберт Семенов «Дьокуускай куорат бэрэстэбиитэллээх уорганын 200 сыла» диэн үбүлүөйдээх мэтээли туттарда. Саҥа сылаас тохтобулга оптуобус кэлэр-барар чааһын ыйар монитор, салгыны ыраастыыр рециркулятор, ыскамыайка, доруобуйаларынан хааччахтаах дьоҥҥо пандус оҥоһуллубут. Маны таһынан, тохтобулга суотабай төлөпүөнү иитэр электрическэй розетка  олордуллубут.

Сылаас тохтобулга дьон киирэн оптуобустары кэтэһэ олордохторуна, тута биир саҥа көлө кэлэн, тохтобултан үөрэ-көтө тахсыбыт пассажирдары куорат киинигэр илдьэ барда.

Елена ПОТОЦКАЯ, “Саха сирэ” хаһыат.

 

+1
0
+1
0
+1
0
+1
0
+1
0
+1
0
+1
0