Сайсары күөл тулатын тупсарыы бырайыага бигэргэннэ

Ааптар: 
Бөлөххө киир:

Уопсастыбаннас көҕүлээһининэн, олохтоох салайыы Бүтүн Россиятааҕы сэбиэтин өйөбүлүнэн киин куораты сайыннарыы боппуруостарын дьүүллэһиигэ анаммыт куорат олохтоохторун II Форума саҕаланна.

edersaas.ru


Дьокуускай кылаабынай архитектора Ирина Алексеева салайыытынан «СахаЭкспокииҥҥэ» Сайсары күөл тулатынааҕы сири тупсарыы дизайн-бырайыага дьүүллэһилиннэ. Дьүүллэһиигэ куорат Думатын дьокутааттара, Октябрьскайдааҕы, Сайсарытааҕы уокуруктар салалталара, уопсастыбаннас бэрэстэбиитэллэрэ, бырайыакка хабыллар территорияҕа олорор ыаллар итиэннэ Москваттан «Стрелка» консалтинговай бюро исписэлиистэрэ Наталья Маковецкая, архитектор Петр Мироненко сырыттылар.

«Куорат тупсаҕай эйгэтин тэрийии» диэн тумус тутуллар бырайыакка куоракка быйыл федерация уонна өрөспүүбүлүкэ бүддьүөттэриттэн 50 мөл. солк. көрүллүөхтээх. Ааспыт күһүн Дьокуускай куорат ОДьКХ уонна тутуу федеральнай министиэристибэтин иһинэн үлэлиир бырагыраамаҕа хабыллыбыт 40 куорат иһигэр киирбитэ итиэннэ Сайсары күөл тулатын тупсарар бырайыагы оҥорбута. Бырайыак түөрт зонанан (Ийэ болуоссатынан, Лермонтов уулуссатынан, Сайсары кытылынан уонна олбуордар территорияларынан) араарыллан оҥоһуллубута, онуоха куорат климатын, экологиятын уратылара, архитектурнай үгэстэрэ толору учуоттаммыта. Форум кыттыылаахтара Ийэ болуоссатыгар фонтан баар буоларыгар, спортивнай былаһаакка оҕолорго эрэ буолбакка, улахан дьоҥҥо эмиэ ананарыгар баҕаларын эттилэр. Сайсары уокуругун олохтооҕо Владимир Андросов күөлү тула көҕөрдөр наадатын бэлиэтээтэ. Санаа атастаһыытын түмүгүнэн, дизайн-бырайыак кэнсиэпсийэтэ бигэргэннэ. Онон, сотору кэминэн ытык Эбэ кытыла саҥалыы оҥоһуллан, Туймаада туонатын олохтоохторун биир саамай сөбүлээн сылдьар сирдэринэн буолуоҕа.

Раиса Сибирякова, «Саха сирэ» хаһыат,  edersaas.ru

+1
0
+1
0
+1
0
+1
0
+1
0
+1
0
+1
0