“П.А.Ойуунускай аатынан Саха академическай тыйаатыра” Саха Өрөспүүбүлүкэтин автономнай тэрилтэтин уус-уран салайааччыта, Арассыыйа Федерациятын норуодунай артыыһа, Арассыыйа Федерациятын уонна Саха Өрөспүүбүлүкэтин ускуустубаларын үтүөлээх диэйэтэлэ, Саха Өрөспүүбүлүкэтин бочуоттаах гражданина, ССРС, Арассыыйа Федерациятын уонна Саха Өрөспүүбүлүкэтин Судаарыстыбаннай бириэмийэлэрин лауреата Андрей Саввич Борисов Олоҥхо уонна эпос Арктикатааҕы киинин тутуу туһунан санаатын үллэһиннэ:
— Биһиги хоту дойдуга муустаах муора хонноҕор олоробут. Ол иһин биһиги култуурабыт хотугу култуураны кытта быһаччы ситимнээх. Бу аҕыйах хонуктааҕыта Мариинскай судаарыстыбаннай академическай тыйаатыр уус-уран салайааччыта, Арассыыйа Федерациятын Үлэ Дьоруойа, аатырбыт мусукаан Валерий Гергиев гостуруоллуу кэлэ сылдьан бу тутуллан эрэр Арктикатааҕы киини көрөн сөрү диэн сөхтө, сүргэтэ өрө көтөҕүлүннэ.
Кини этэринэн, дойду баһылыга Владимир Путин Калининградка, Владивостокка, Кемеровоҕа, Дьокуускайга култуура кластердарын тутуҥ диэн сорудахтаабыт. Онон бу кластердар кэккэлэригэр Дьокуускайга тутуллар киин киирэрэ хайҕаллаах диэтэ. Соторутааҕыта биһиги Ил Дархаммыт Айсен Николаев улуустарга баар Олоҥхо кииннэрин бу Арктикатааҕы киини кытта ситимниэххэ диэн сорудах биэрбитэ. Биллэрин курдук, улуустарга 30 тахса купольнай кулууптар тутуллубуттара. Онон Арктикатааҕы киин биир ураһата улуустарга ананыаҕа. Онно буолбут испэктээкиллэр улуустарга купольнай дьиэлэргэ тиийиэхтэрэ, оттон улуустарга буолар тэрээһиннэр бу кииҥҥэ кэлиэхтэрэ. Ол аата бэйэ-бэйэтин кытта ситимнээх. Онон Сайсары ытык күөлбүт таһыгар Арктикатааҕы киин тутуллара дириҥ суолталаах уонна ис хоһоонноох дии саныыбын.
Бэлэмнээтэ Женни Стрюкова