«Сайсары» бааһынай ырыынагын атыыһыттара коронавирус анаалыһын туттараллар
Бүгүҥҥү күҥҥэ киин куорат «Сайсары» бааһынай ырыынагар урукку курдук атыылааччы элбэҕэ суох да буоллар, син бааллар.
edersaas.ru
Ол курдук, оҕурсу сыаната ортотунан 200 солк., редис — 100 солк., уроп киилэтэ — 400 солк, «пучога» — 50 солк. Сибиэһэй фрукта арааһа дэлэйбит. 500 л былаастык ыстакаан черешня, абрикос — 200 солк.
Туох-туох суоҕуй манна? Даачалаахтар кэлэн, оҕуруоттарын аһын батара тураллар эбит. Араас тиит мас кытта баар.
Акация, черемуха, яблоня арааһа. Сыаната — 1000-2000 солк. курдук.
Интэриэс баар буолан бачча элбэх атыыга турар буоллаҕа. Киэһэ 18 ч. ырыынакка сырыттахпына, сүпсүлгэн бөҕө буола түстэ. Роспотребнадзор ыйыытынан ырыынак дьаһалтата суһаллык сыстыганнаах коронавируска анаалыскытын туттара охсуҥ диэбиттэр. Мантан инньэ ким анаалыһа «отрицательнай» эрэ буоллаҕына үлэлиирэ көҥүллэнэр буолбут. «Бэҕэһээ туттарбыттар бүгүн 16.00 чаастан үлэлэрин салҕыахтара. Ол иннинэ ырыынак үлэлээбэт, сабыллар» диэн сурах тилийэ көттө. Аны анаалыстарын туттарбыт дьонтон ким «сыыйыллара» биллибэт. Онон ырыынакка бүгүн күнүс бара сылдьыбыттар «кураанаҕы кууспуттара» чахчы. Ол 16 ч. ырыынак аһылыннаҕына даҕаны, хас киһи үлэтигэр тахсара — боппуруос.
Батсаапка «ырыынакка «ковидтаабыт» киһини булбуттар» диэн тарҕана сылдьар да, ырыынак сабыллыытын дьиҥнээх төрүөтэ ити үөһэ бэлиэтээбитим курдук. Атыыһыттар анаалыстарын туттараллара сөп буоллаҕа. Дьаҥ тарҕанар сирэ — ырыынак.
Уонна биир соһуйа, бэлиэтии көрбүтүм — «сарсын үлэлээбэт буоллубут» диэни истээт, сонно тута атыыһыттар сыаналарын түһэрэ оҕустулар. 200 солк. атыылана турбут черешня, абрикос 100 солк. буола түстэ. Сонно оҕурсуу сыанатын 150 солк. «уруһуйдуу» оҕустулар. Хата, ол кэмҥэ аҕыйах киһи хаамса сылдьыбыта, абыраннылар. Хото атыыластылар.
Мин биир атыыһыттан «сыанаҕыт тоҕо ыараханай?» диэн ыйыппыппар, (саамай чэпчэкитэ киилэтэ 300-төн тахса солк.), сэһэргэһээччим: «Билигин табаар Орто Азия өрөспүүбүлүкэлэриттэн эрэ кэлэр. Онон конкуренция суох. Уонна аҕалыыта наһаа эрэйдээх. Олус түргэнник буорту буолар», — диэн быһаарда. «Оттон тоҕо оччоҕо сыанаҕытын түһэрэ оҕустугут?» диэн ыйыппыппар: «Аһыллыбыт дьааһыктары тута атыылыы охсуохха наада. Аны хаһан анаалыс туттаран, ол туох түмүгү аҕалара — туспа сэрийээл», — диэн хардарда.
Дьэ, ити курдук «Бааһынай ырыынагар «ковидтааҕы» булбуттар» диэн сурах төрүөтүн ис хоһооно итинник арылыннаҕа. Урбаанньыттар да оннук сурах бара буоллар, бэйэ-бэйэлэрин икки ардыгар кэпсии уонна тарҕата охсуо этилэрэ буоллаҕа. Дьэ, сэрэтэллэрэ түргэнинэн маладьыастар эбит. Мин ол анаалыстарын туһунан биир лаапкаттан эрдэ истэн, түгэҕэр кэлиэхпэр диэри киһиттэн киһиэхэ бэриллэн, кэннибиттэн ол сурах миигин «батыһан» испитэ. Хайыаҥый, ырыынак сокуона оннук буоллаҕа…
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа ааптар түһэриитэ.