Кирилл Бычков муус устар 12-14 күннэригэр, Дьааҥы оройуонугар сырытта.
Өрөспүүбүлүкэ бастакы вице-премьерэ социальнай эбийиэктэр тутууларын билистэ уонна хаарбах туруктаах дьиэттэн дьону көһөрүү бырагыраамата олоххо киириитин бэрэбиэркэлээтэ. Баатаҕайга хаарбах дьиэттэн дьону көһөрүү өрөспүүбүлүкэтээҕи анал аадырыстаах бырагырааматынан тутулла турар үс дьиэни көрдө. Кирилл Бычковка 2019 сылтан 2025 сылга диэри оройуоҥҥа хаарбах туруктаах (2012 сылтан 2017 сылга диэри хаарбах туруктаахха киллэриллибит) 64 дьиэни көтүрүү былааннанарын эттилэр. Чугастааҕы икки сылга 7 339,16 кв. м. олорор дьиэттэн 381 киһи көһүөхтээх.
Бастакы вице-премьер тулаайах оҕолор олорор аҕыс кыбартыыралаах дьиэлэригэр сырытта. 2023 сылга диэри саҥа дьиэни 37 оҕо ылыахтаах.
Маны сэргэ, Кирилл Евгеньевич атын тутууларга болҕомтотун эмиэ уурда. Оройуон киинигэр 140 оҕо сылдьарыгар тутуллуохтаах уһуйаан былаһааккатын уонна «Озерная» хочуолунайы көрдө. Верхоянскайга 1 №-дээх уһуйаан уонна оскуола тутуллуутун билистэ. «Куорат эйгэтин тупсаҕай оҥоруу» федеральнай бырайыагынан тутулла турар «Үһүйээн» элбэх хайысхалаах искибиэргэ сырытта. Манна даҕатан эттэххэ, бу бырайыактарынан олохтоох салалта Бүтүн Арассыыйатааҕы күөн күрэскэ кыттыбыта.
Сайдыылар Кирилл Бычковтан оскуола тутуутун труорустулар. Кыһа хаарбах туруктааҕынан, оҕолор бөһүөлэккэ үс араас сиринэн үөрэнэллэрин эттилэр. Олортон биир, урбаанньыттан куортамҥа ылбыт дьиэлэрэ, оҕолор үөрэнэллэригэр анаан оҥоһуллубут.
Кирилл Бычков оройуоҥҥа үлэтин түмүгүнэн тустаах министиэристибэлэргэ уонна биэдэмистибэлэргэ, тэрилтэлэргэ уонна оройуоҥҥа сорудахтары биэрдэ. «Арктиканы сайыннарыыга туох кыалларынан үлэлэһии — биһиги сорукпут. Этиллибит бырайыактар уонна саҥа, хаачыстыбалаах олорор дьиэлэри тутан киллэрии нэһилиэнньэ олоҕун-дьаһаҕын улаханнык тупсарыа», — диэтэ, эдэр ыччаты хаачыстыбалаах үөрэҕи ыларыгар, тупсаҕай олохтоноругар усулуобуйа тэрийдэххэ төрөөбүт түөлбэтигэр олохсутар кыах баар буолуоҕун бэлиэтээтэ.
СӨ Ил Дархан уонна Бырабыыталыстыба пресс-сулууспата