Хаһыат ааҕааччыта Дьокуускайы тоҕо кэрэхсиирин манна ааҕыҥ.
Биһиги Дьокуускай куоракка кыстаабыппыт бэһис сыла. Оҕолорбутугар оҕо көрсөн көмөлөһөбүт. Тыа олоҕун кытта тэҥҥээтэххэ, куорат олоҕо быдан сынньалаҥ: от-мас тиэйбэккин, муус уулаабаккын, оһох оттон хачыгырайбаккын. Барыта бэлэм! Бэл, иһити илиигинэн сууйбаккын, массыына сууйар. Таҥаһы сууйар массыынаҕа таҥаскын уган эрэ кэбиһэҕин! Хата, сиэммитин уһуйааҥҥа таһар буолан, кэм таһырдьа тахсабыт, салгын сиибит. Сынньалаҥ кэммитигэр киинэҕэ, тыйаатырга, цииркэҕэ сылдьабыт. Сороҕор мусуойга, быыстапкаҕа барабыт. Хамсык иннинэ мин бэйэм «Арчы» дьиэтигэр, үһүс оскуолаҕа, бэл оннооҕор, Тарбаахап маастар-кылааһыгар сылдьан испитим. Сиэмминээн араас онлайн-күрэхтэргэ кыттан, үксүгэр бириистээх миэстэлэргэ тиксэбит. Куоракка олорор киһи билиитэ-көрүүтэ кэҥиир, кэрэ эйгэҕэ тардыһыыта күүһүрэр эбит диэн түмүк оҥоруохха сөп эбит!
Дьокуускайбыт кэлиҥҥи сылларга сүрдээҕин сайдыбыт, тупсубут: араас кэрэ көстүүлээх дьиэлэр тутуллубуттар, пааматынньыктар туруоруллубуттар, искибиэрдэр аһыллыбыттар. Урут биһиги устудьуоннаабыт кэммитин кытта тэҥнээтэххэ, билиҥҥи Дьокуускай быдан атын, тупсаҕай көрүҥнээх.
Сотору кэминэн куорат мээрин быыбара буолаары турар. Быыбардааччыларга этиэм этэ: үчүгэйдик толкуйдаан, дьиҥ — чахчы үлэлиэн баҕалаах, аныгылыы көрүүлээх, ыраас суобастаах киһини талыҥ!
Елена Прокопьева, уопсастыбаннай кэрэспэдьиэн
Хаартыска: ru.wikipedia.org