Маны аах Уопсастыба

САЙДАР ЭЙГЭНИ ОЛОХТУУРГА БАРЫ ТУРУНУОҔУҤ!

Ыам ыйын 27 күнүгэр, «Эркээйи эргиирэ» бырагырааманы олоххо киллэрии боппуруостарынан «Zoom»-ҥа ыытыллыбыт методическай ис хоһоонноох сэминээр киэҥ сэҥээриини ылла. Тэрээһиҥҥэ пилотнай үөрэх былаһааккаларын таһынан, бырагырааманы олоххо киллэрэр баҕалаах тэрилтэлэр кыттыстылар.

Онлайн сэминээргэ оскуолаҕа үөрэх уонна наука хайысхатын сүрүннүүр завучтар, уһуйаан иитээччилэрэ (старшай воспитателлэр), методическай холбоhуктар салайааччылара, эбии үөрэхтээhин методистара, кылаас салайааччылара кыттыыны ыллылар. Уопсайа 200 курдук педагог интэриниэт ситимигэр холбосто. Тэрээһин Саха ϴрөспүүбүлүкэтин үөрэҕин уонна наукатын министиэристибэтэ бигэргэппит былааныгар олоҕуран тэрилиннэ. Онтон бу үлэни сүрүннээччинэн «Юные якутяне» өрөспүүбүлүкэтээҕи тирэх киин буолар.
Семинары «Эркээйи эргиирэ» бырагыраама ааптардара: Екатерина Чехордуна, педагогическай наука кандидата, Сϴ үөрэҕириитин үтүөлээх үлэhитэ уонна Валентина Степанова, философия наукатын кандидата, СӨ үтүөлээх учуутала ыыттылар. Сэминээри модераторынан Геннадий Охлопков, «Юные якутяне» өрөспүүбүлүкэтээҕи тирэх киин үлэһитэ, «Эркээйи эргиирэ» бырагыраама олоххо киириитин сүрүннээччитэ  үлэлээтэ.


Екатерина Петровна «Аныгы кэмҥэ төрүт үгэстэри тутуhан сайдар эйгэни тэрийии» диэн тиэмэни киэҥник хабан арыйда. Өйдөбүллэргэ олоҕуран, уһуйааҥҥа, оскуолаҕа, эбии үөрэхтээһин тэрилтэтигэр ханнык үлэ көрүҥүнэн ситиһиллиэн сөбүн ыйда. Ордук болҕомтотун киирээри турар «Оскуола иитии үлэтин бырагырааматыгар» диэҥҥэ туһаайда. «Бастаан бэйэ үлэтин, буола турар быһыыны-майгыны ырытан көрүллүөхтээх, салгыы «Эркээйи эргиирэ» этэр санаатыгар сөп түбэһиннэрэн сааһыланыы барыахтаах, онтон учуутал, педагог кыайар хайысхаларынан дириҥээн саҥа таһымҥа тахсыахтаах», – диэн бэйэтин сүбэлэрин эттэ.
Валентина Егоровна «Тус бэйэни «Өй-санаа» уонна «Дьарык» эйгэтигэр сайыннарыы сэhэнэ» диэн тиэмэни «Айыы кыһатыгар», «Сэргэлээх» оскуолатыгар кэллиэгэлэрин кытта айымньылаахтык үлэлээн ситиспит түмүктэригэр олоҕуран, сайыннарыылаах үөрэх ис хоһоонун арыйда. Маныаха «учуутал» халыыбыттан тэйэн, «уһуйааччы» таһымыгар тахсар, «Уруок» өйдөбүлүттэн тахсан, «Дьарык» ис хоһоонугар умсар кэм кэлбитин тоһоҕолоон бэлиэтээтэ. «Бу түмүгэр эйгэ киһитийиэхтээх, олохтон үөрэнэр үөрэнээччи модела олоҕуруохтаах. Ол аата, тус бэйэни сайыннарар үөрэх сэһэнэ – «киһини киһиэхэ төнүннэрии, омугу омукка төнүннэрии», – диэн бэлиэтээн туран, ис хоһоонноох үлэҕэ ыҥырда.


Сэминээр кыттыылаахтара тэрээһин практическай үлэҕэ хайысхалыыр, баһаччы дьайар суолталаммытын бэлиэтээтилэр. Салгыы үлэлииргэ интэриэс күөдьүйбүтүн, баҕа санаа үөскээбитин эттилэр. Түмүккэ киирбит ыйытыыларга хоруйдаатылар, сүбэ-ама бэрилиннэ. Сэминээр  бүтүүтүгэр иһитиннэрбиттэринэн, тэрээһиҥҥэ кыттыбыт дьон бары СӨ үөрэҕин уонна наукатын министиэристибэтин, «Юные якутяне» тирэх киин аатыттан электроннай сэртипикээттэри тутуохтара.
Түгэнинэн туһанан, бырагырааманан үлэлиэн баҕалаах бары тэрилтэлэри «Эркээйи ситимэ» диэн батсаап бөлөххө ыҥырабыт.  8(984) 107-78-16 төлөпүөҥҥэ эрийиэн чопчулаһыаххытын сөп. Сайдар эйгэни олохтуурга бары турунуоҕуҥ!

«Юные якутяне» тирэх киин пресс-сулууспата

1
0