Култуура Сүрүн

Сайа Махтал киэһэтэ

Бэҕэһээ норуот суруйааччыта Наталья Михалева-Сайа «Саха сирин норуодунай суруйааччыта» ааты иҥэрбиттэригэр тэрийбит Махтал киэһэтинэн ис сүрэхпиттэн эҕэрдэлиибин!

edersaas.ru

Чахчыта да буолуохтаах киһи буолла, ылыахтаах киһи ылла. Мин көрүүбэр, билиҥҥи саха литературатыгар айар талаанынан саамай инники кирбиигэ сылдьар бэйиэт, суруйааччы, ити аата да суох норуот тапталлаах бэйиэтэ.
«Сайа бэҕэһээҥҥи Махталын киэһэтин миэхэ махтанан саҕалаата»—  диэн соһуттулар даҕаны, үөртүлэр даҕаны. Улахан суруйааччыттан итинник тыллары истэр дьол буоллаҕа. Дьиҥинэн, ити идея Егор Неймохов баҕа санаата этэ, ону мин хатылаатаҕым эрэ дии. Онтум салгыны хамсаппыт эбит, норуот санаатын таба таайбыт буолан ситиһиилэммит. Аан бастакынан тыл көтөхпүт, докумуонун оҥорсубут дьоллоохпун. Егор Петрович: «Сайа уонна Володя Федоров норуодунай суруйааччы буолуохтаахтар», — диирэ. Иккиэн норуодунай суруйааччы үрдүк ааты сүктүлэр. Гошам барахсан анараа дойдуттан үөрэн мичээрдээбит буолуохтаах…


Өссө төгүл Сайаны  саха норуодунай суруйааччыта буолбуккунан эҕэрдэлиибин, айар үлэҕэр өссө үрдүк кирбиилэри, чэгиэн туругу, дьолу соргуну баҕарабын! Чахчы да, норуот сөбүлүүр суруйааччыта буолаҥҥын, норуот туруорсан, бюрократическай моһоллору туораан, ити чиэстээх ааты сүктүҥ. Кырдьыга да, норуот күүһэ — көмүөл күүһэ буоларын итэҕэйдибит. »Мин алҕас эрэммит куоратым» хоһооҥҥор эппиккинии,  Дьокуускайыҥ алҕас буолбакка, чахчы эрэнэр, айар-тутар, үлэлиир-хамныыр, дьоллонор куоратын буолбута үөрүүлээх.

«Саха сирэ», edersaas.ru сайтка анаан Мария НЕЙМОХОВА, Санкт-Петербург

 

2
0
Telegram @edersaas20