(Кэллиэгэм кэпсээнэ)
Биэрискэ ыал соҕотох мааны кыыһа. Убайдара бэйэлэрэ ыаллар. Дьиэ-уот тэринэн, дойдуларыгар ким суоппар, ким хачыгаар — бары үлэлээн хачыгыраһаллар. Олох укулаата уларыйан, бу 90-с сыллар ортолоругар хамнас аанньа кэлбэт, бары үксүн хаһаайыстыбаҕа, сүөһүгэ-аска эрэнэллэр.
Биэрискэ барыларыттан балыс эрээри, мээнэ атаах-тараах кыыс буолбатах. Оскуолаҕа куруук туйгуннук үөрэммитэ, кинигэ ааҕарын сөбүлүүрэ, олимпиадаларга кыттан ситиһиилэнэрэ. Онон эксээмэннэрин бэркэ туттаран университекка нуучча тылын учууталын үөрэҕэр киирбитэ. Ийэтэ Өрүүнэ, аҕата Сэмэн – тыа сирин сэмэй дьоно, Биэрискэнэн киэн тутталлара оруннаах. Уолаттара да дьоҥҥо сирдэрбэт үлэһиттэр, булчут – балыксыт ааттаахтара.
Университет кэнниттэн кыыс куоракка хааларга быһаарынан оскуолаҕа миэстэ булбута. Куорат киинигэр куортам сыаната олус үрдүгэ, онон кыргыттары кытта 17 -с кыбаарталга мас дьиэҕэ кыстаары кыбартыыра устубуттара. Биэрискэ аны Вера Семеновна дэнэр. Үлэлиир оскуолата тэйиччи, оптуобуһунан өр айанныыр. Үксүгэр, иккис симиэнэҕэ бүтэһик уруоктаах күнүгэр, дьиэтигэр им – балай хараҥаҕа тиийэр. Дьүөгэлэрэ араас оскуолаларга ким бастакы симиэнэ, ким иккис – бары туһунан сылдьаллар.
Биэрискэ ийэтэ Өрүүнэ учуутал кыыһыгар дьоһун таҥас тэрийээри оҕонньоро Сэмэнниин биир сүөһүнү туттарга сүбэлэспиттэрэ. Добуочча сыанаҕа кырымахтаах хара саһыл тириитин атыылаһан, бастыҥ иистэнньэҥи кэпсэтэн, ол кэмҥэ саамай муодунай кулгаахтаах “ушанка” тиктэрбиттэрэ. Онон Биэрискэ дьонтон итэҕэһэ суох таҥнан-саптан сылдьардыы сананар. Ол эрэн сыаналаах мааны бэргэһэ арыт түөкүттэр саба түһүүлэригэр төрүөт буолара.
Биир кыһыҥҥы киэһэ Биэрискэ иккис симиэнэ кэннэ оптуобустан оронон тахсан, туман быыһынан тиэтэйэ-саарайа дьиэтин диэки баран истэ. Сороҕор үөрэнээччилэр тэтэрээттэрин уруок быыһыгар ситэн бэрэбиэркэлээбэккэ хаалар, оччоҕо дьиэтигэр илдьэргэ күһэллэр. Бүгүн хас да кылааска суругунан үлэ ыытан, эмиэ суумкатыгар хаалаан истэ. Эмискэ хантан кэлбиттэрэ биллибэт, хараҥа күлүктэр күлүкүчүс гына түстүлэр да, икки эдэр уол субу баар буоллулар. Биэрискэ хараҕа сытыы, көрбүтэ – биирэ саха, биирэ нуучча, саастарынан кини үөрэтэр онустарыттан атына суох курдуктар. Өйдөнөр кыах биэрбэккэ, уолаттар ыстанан кэллилэр да, кыыһы түҥнэри анньан түһэрдилэр. Биэрискэ тураары өндөҥнүү сатаата. Охторугар суумката арыллыбытыттан оҕолор тэтэрээттэрэ хаарга бурал гына ыһылынна. Саха уола кыыска төҥкөйөн бэргэһэтин сулбу тардан ылла. Арай аннараа уола хаһыытыы түстэ:
— Ты что, не видишь? Это же учительница! Не надо! – диэт, саһыл бэргэһэни былдьаан Биэрискэ диэки кыыратта. Иккиэн кэлбиттэрин курдук тумаҥҥа сүтэн хааллылар. Кыыс туран бэргэһэтин кэтэн, ытаан сыҥсыйа – сыҥсыйа ыһыллан хаалбыт тэтэрээттэри хомуйа сатыы сырытта…
Сарсыныгар уруокка Вера Семеновна илийэн баран куурбут, кыратык кумаламмыт тэтэрээттэри түҥэппитигэр үөрэнээччилэрэ соһуйбут, өйдөөбөтөх харахтарынан көрөн олорбуттара.
Айталыына Хоһуунаба