Сахацирк эдэр артыыстара «Росгосцирк» анал бирииһинэн наҕараадаланнылар

Быйыл муус устар 6 күнүттэн ыам ыйын 2 күнүгэр диэри I Норуоттар икки ардыларынааҕы циркэ онлайн-бэстибээлэ ыытылынна.  Бу бэстибээли төрүттээччинэн циркэ биллиилээх артыыһа, жонглер, режиссер, продюсер, норуоттар икки ардыларынааҕы үгүс бэстибээллэр призердара Дмитрий Чернов буолар.

Онлайн-бэстибээлгэ уопсайа 685 сайаапка киирбититтэн  тэрийэр кэмитиэт  100 нүөмэри талан ылбыт. 20 киһилээх дьүүллүүр сүбэҕэ Испания, АХШ, Австралия, Канада, Израиль, Франция, Монголия, Перу, Эфиопия, Венгрия курдук, о.д.а. дойдулартан биллиилээх цирковой диэйэтэллэр үлэлээтилэр.

Маннык көрүҥүнэн ыытыллыбыт бастакы онлайн-бэстибээлгэ Саха судаарыстыбаннай циркэтин акробатическай бөлөҕө кытынна. Бу – Пекиннээҕи Норуоттар икки ардыларынааҕы искусство колледжын бүтэрбит «Поколение NEXT-3» эдэр артыыстар  — Семен Афанасьев, Алексей Иванов, Василий Фёдоров, Сергей Баданин, Сергей Будуранов, Туяра Гуляева уонна Анастасия Старостина.

Кинилэр «СемьЯ» нүөмэрдэрин көрдөрөннөр, Фонтанкаҕа Санкт-Петербурдааҕы циркэҕэ 3 ый устата үлэлииргэ «Росгосцирк» Арассыыйатааҕы судаарыстыбаннай хампаанньа анал бирииһинэн наҕараадаланнылар.

Талааннаах эдэр ыччаттарбытын айар үлэҕэ уочараттаах ситиһиилэринэн истиҥник эҕэрдэлиибит. Бу курдук, Сахациркэ артыыстарыгар саҥа саҕахтар арыллан истиннэр!

https://youtu.be/CDDE_k9TlTg

Татьяна Маркова, edersaas.ru