“Сахатранснефтегаз” социальнай бырагырааманан сайаапка хомуйуутун саҕалаата
Бу нэдиэлэттэн “Сахатранснефтегаз” АУо, Саха сиригэр гаастааһыны киллэриигэ сүрүн оператор быһыытынан, бэйэтин сайтыгар SG.AOSTNG.RU социальнай гаастааһын туһунан сиһилии ырытыылаах саҥа салааны киллэрэн биэрдэ.
Бу салааҕа социальнай гаастааһын бырагырааматын, онно хайдах кыттыахха сөбүн, ханнык улуустарга туох бырайыак баарын барытын сиһилии ааҕыахха сөп. Cаамай сүрүнэ судаарыстыбаннай уонна муниципальнай өҥөлөрү биэрэр порталы таһынан, дьон-сэргэ сайабылыанньаны дьиэтиттэн олорон эрэ саайт нөҥүө биэрэр кыахтанна. Табыгастаах буоллун диэн, манна сайабылыанньаны биэриини түһүмэхтэринэн барытын киллэрэн биэрдилэр. Онон хас биирдии киһи дьиэтиттэн ырааппакка эрэ саайт нөҥүө сайабылыанньа биэрэн, биэрбит докумуоннара ирдэбили аастахтарына анал бырагырааманан тэлгэһэтигэр диэри гаас ситимин босхо аҕалтарыан сөп. Бырагыраамаҕа кыттыы сүрүн ирдэбилинэн дьиэ, уһаайба докумуоннара сөптөөхтүк оҥоһуллубут буолуохтаахтар.
Санатан эттэххэ, РФ бэрэсидьиэнэ Владимир Путин Анал этиитигэр нэһилиэнньэлээх пууннарга тэлгэһэҕэ диэри гаас ситимэ босхо киириэхтээҕин туһунан этэн турар. Биһиги өрөспүүбүлүкэбитигэр маннык социальнай бырайыагы “Сахатранснефтегаз” АУо ыытар. Бу бырагыраама 2023 сылга диэри барыахтаах.
Маны таһынан бырамыысыланнас миниистирэ Максим Терещенко эрдэ бэлиэтээн эппитинэн, ыгыллыбыт гааһы оҥорон таһаарыыны элбэтиэхтээхтэр. Гаас ситимэ кыайан тиийбэт сирдэригэр бу ньыма туһаныллыахтаах.
Аграфена КУЗЬМИНА