Култуура Сүрүн

Саха сирин суруйааччыларын сойууһугар аҕыс киһи киирдэ

Кулун тутан 2 күнүгэр Арассыыйа суруйааччыларын сойууһун приемнай кэллиэгийэтин мунньаҕынан бигэргэнэн, Саха сириттэн аҕыс киһи Сойууска киирдэ.

Арассыыйа суруйааччыларын сойууһун Саха сиринээҕи отделениета – Саха сирин суруйааччыларын сойууһа – ахсынньы 7 күнүгэр сыл түмүгүн таһаарар уопсай мунньах ыыппыта. Мунньахха Саха сирин суруйааччыларын сойууһугар киириэн баҕалаах ааптардар үлэлэрин көрүү буолбута. Бырабылыанньа докумуоннары тутар хамыыһыйатын уонна Сойуус чилиэннэрин уопсай куоластааһыннарынан аҕыс киһи докумуона мэктиэлэммитэ. Салгыы бу ааптардар сайабылыанньалара Москваҕа Арассыыйа суруйааччыларын сойууһун анал хамыыһыйатын көрүүтүгэр барбыта.

Арассыыйа суруйааччыларын сойууһун приемнай кэллиэгийэтин мунньаҕа кулун тутар 2 күнүгэр буолбута. Мунньахха кэллиэгийэ чилиэнэ, Саха сирин суруйааччыларын сойууһун бэрэссэдээтэлэ Наталья Харлампьева кытынна. Кини Москваттан иһитиннэрбитинэн, Саха сириттэн Николай Васильев-Харыйалаах Уола,  Эдуард Ефремов-Дэхси, Алексей Коваленко, Михаил Кривошапкин-Киргэмбис, Надежда Ильина, Петр Самсонов-Бүөтүр Хара, Михаил Сиванков уонна Ольга Янцен Арассыыйа суруйааччыларын сойууһугар киирдилэр.

Николай Васильев-Харыйалаах Уола – поэт, Н.Д.Неустроев аатынан литературнай бириэмийэ бастакы лауреата. Үөһээ Бүлүү улууһун Кэнтик нэһилиэгиттэн төрүттээх, билигин Дүллүкү нэһилиэгэр олорор. “Хоhооннор”, “Халлааҥҥа тыгар күн” диэн кинигэлэрдээх. Эдэр суруйааччылар өрөспүүбүлүкэтээҕи сүбэ мунньахтарын поэзия семинарын арыйыытынан, бастыҥ кыттааччытынан ааттаммыта. Литература маастарыстыбатын өрөспүүбүлүкэтээҕи семинарын, “Москва-Владивосток” эдэр литератордар улахан онлайн сүбэ мунньахтарын кыттыылаахтара.

Эдуард Ефремов-Дэхси – прозаик, экономическэй наука дуоктара, СӨ наукатын үтүөлээх деятелэ. Кини Горнай улууһун Бэрдьигэстээҕиттэн төрүттээх. Эдуард Иванович 40-ча сыл устата өрөспүүбүлүкэбит сиртэн хостонор баайын туһаҕа таһаарыы экономикатын үөрэтэн, чинчийэн кэллэ, хас да кинигэлэр, ыстатыйалар ааптардара. Кэлин уус-уран айымньыга ылсан, историческай сэһэннэри суруйбута.

Алексей Коваленко – поэт, идэтинэн геолог, Киевтааҕы судаарыстыбаннай университет Геологическай факульетын бүтэрэн Саха сиригэр ананан үлэлии кэлбитэ. Билигин Дьааҥы улууһугар Баатаҕайга олорор, үлэлиир. Кини Украина Черниговскай уобалаһыттан төрүттээх. Төрөөбүт дойдутун Украинатын, иккис дойду оҥостубут Сахатын сирин айылҕатын, ураты көстүүлэрин тустарынан суруйар. “Осеннее зарево”, “Дороги сердца”, “Мои побережье” диэн кинигэлэрдээх, кэлин “Избранное” хоһооннорун хомуурунньуга тахсыбыта.

Михаил Кривошапкин-Киргэмбис – поэт, эбээннии, нууччалыы суруйар, Кэбээйи улууһун Сэбээн Күөлүттэн төрүттээх. М.К.Аммосов аатынан Хотугулуу-илиҥҥи федеральнай университет выпускнига, аҕыйах ахсааннаах хотугу норуоттар ыччаттарын сэбиэтин бэрэссэдээтэлэ. Бу соторутааҕыта «Мявму икэн» диэн хоһооннорун хомуурунньуга күн сирин көрбүтэ. “Голос Севера” бүтүн Арассыыйатааҕы литературнай куонкурус кыайыылааҕа, эдэр суруйааччылар өрөспүүбүлүкэтээҕи сүбэ мунньахтарын кыттыылааҕа.

Надежда Ильина – поэт, драматург, “Чолбон” литература сурунаалын эппиэттиир сэкирэтээрэ, Н.Д.Неустроев аатынан литерутарнай бириэмийэ лауреата, СГУ Саха тылын уонна култууратын факультетыгар үөрэммитэ. Мэҥэ Хаҥалас улууһун Тиэлиги нэһилиэгиттэн төрүттээх. “Сарсын буолуо” диэн пьесатынан режиссер Сергей Потапов испэктээкил туруорбута. Кэлин Надежда суруйуутунан “Тымтык саас”, “Айаан суола”, “Ытыллыбыт ох төннүбэт”, “Чолбон” испэктээкиллэр туруоруллубуттара. Эдэр суруйааччылар өрөспүүбүлүкэтээҕи сүбэ мунньахтарын кыттыылааҕа.

Петр Самсонов-Бүөтүр Хара – прозаик, ону сэргэ поэзияҕа, драмаҕа эмиэ ылсан үлэлиир, Таатта улууһун Хара Алдан нэһилиэгиттэн төрүттээх. Томскайдааҕы култуура-сырдатар училищетын үөрэнэн бүтэрбитэ. Таатта, Муома улуустарын хаһыаттарыгар үлэлээбитэ. “Иэстэбил”, “Хараҥа түүн ханыылара” кинигэлэр ааптардара.

Михаил Сиванков – прозаик, Дьокуускайга төрөөбүтэ. Дьокуускайдааҕы өрүс училищетын бүтэрбитэ. Ис дьыала министиэристибэтигэр үлэлээбитэ. Билигин Ленскэй куоракка олорор, үлэлиир. “По ту сторону” роман-трилогия ааптара. Айымньылара “Дальний Восток”, “Полярная Звезда”, “Российский колокол” литература сурунаалларыгар бэчээттэммиттэрэ. Эдэр суруйааччылар сүбэ мунньахтарын кыттыылааҕа.

Ольга Янцен – поэт, СГУ филологическай факультетын үөрэнэн бүтэрбитэ. А.К.Михайлов аатынан литературнай бириэмиэй лауреата, “Поэзия русского слова” бүтүн Арассыыйатааҕы, “Берег дружбы” өрөспүүбүлүкэтээҕи поэзия фестивалларын лауреаттара, дипломаннара. Хоһооннорун хомуурунньуктара Дьокуускайга бэчээттэнэн тахсыбыттара. Сахалыы, нууччалыы суруйар. Эдэр суруйааччылар өрөспүүбүлүкэтээҕи сүбэ мунньахтарын кыттыылааҕа.

Аграфена КУЗЬМИНА

5
0
Telegram Whatsapp