СӨ Тыатын хаһаайыстыбатын министиэристибэтэ өрөспүүбүлүкэ оҥорон таһаарар тэрилтэлэрин кытары, «Арассыыйа амтана» бастакы национальнай куонкуруска кыттарга сайаапка биэрдэ. Онно тоҥ балык, сылгы этэ, саха ынаҕын арыыта, отоннорбут, ону таһынан Өлүөхүмэ сыыра, утахтар (таба муоһуттан оҥоһуллубут чэбдигирдэр утах, тайҕа тымныы чэйэ, кыбаас) киирдилэр.
СӨ Тыатын хаһаайыстыбатын миниистирэ Александр Атласов маннык кэпсээтэ:
— Бу куонкуруска кыттыы Саха сирин оҥорон таһаарааччыларын дойду ырыынагар тахсалларыгар кыаҕы биэриэ. Биһиги бородууксуйабыт минньигэһин ааһан, ис дьиҥ туһалааҕын көрдөрүөхпүт. Саха балыга, этэ аан дойдуга номнуо биллэр буоллаҕына, саха ынаҕын арыыта — сонун ас. Арыыны «Саха ынаҕа» тэрилтэ быйыл саҥа таһаарда. Төрүт ынахпыт үүтэ үрдүк сыалааҕынан биллэр, онон белогунан, битэмиининэн, минеральнай эттиктэринэн баай.
Хотугу таба муоһуттан оҥоһуллубут чэбдигирдэр утах эмиэ сонун ас буолар. Сотору кэминэн куоластааһын буолуоҕа, биир дойдулаахтарбын көхтөөх кыттыыны ылалларыгар ыҥырабын.
Виктория Бястинова, «Саха сирэ» хаһыат, edersaas.ru
+1
+1
+1
+1
+1
+1
+1