Саха сиригэр таһаҕаһы тиэрдии былаана 99,8 % туолла

Бөлөххө киир:

Быйыл Саха сиригэр таһаҕаһы тиэрдии коронавирус пандемиятынан, өрүстэр уолан уонна ойуур баһаардарынан уустуктары үөскэтэ сырытта. Ол эрээри, туруоруллубут былаантан бүгүҥҥү күҥҥэ 99,8 % туолбута бэлиэтэнэр. Бу туһунан өрөспүүбүлүкэ вице-премьера Алексей Колодезников бүгүн бырабыыталыстыба хамыыһыйатыгар эттэ.

1 070 880,8 туонна былааннаммытыттан билигин 1 068 799,2 туонна таһаҕас — таас чох, ньиэп, ас-үөл, тыа хаһаайыстыбатын бородууксуйата тиэрдиллибит. Алексей Колодезников бырабыыталыстыба хамыыһыйатын чилиэннэригэр уонна СӨ Нэһилиэнньэ олоҕор куттал суох буолуутун кэмитиэтин үлэһиттэригэр махтанна.

«Коронавирус дьаҥа турар кэмигэр сулууспалар бары тустаах үлэни санитарнай-эпидемиологическай нуормалары тутуһан ыыттылар. Алдан өрүс уолан уонна ойуур баһаардара да мэһэйдээтэллэр, Дьабаракы Хайаттан Уус Маайаҕа уонна Усуйаанаҕа таас чох кэмигэр тиэрдилиннэ», — диэн вице-премьер иһитиннэрдэ.

Таһаҕаһы тиэрдии алтынньы 15 күнүгэр түмүктэнэрэ күүтүллэр. Ол кэмҥэ диэри Тиксиигэ 3,7 тыһыынча туонна ньиэп тиийиэхтээх, итиэннэ «УК Тепло+» тэрилтэҕэ анаан Дьабаракы Хайаттан таас чоҕу тиэрдии түмүктэниэхтээх.

СӨ Ил Дарханын уонна бырабыыталыстыбатын пресс-сулууспата.

Хаартыска — www.sakha.gov.ru саайтан.

+1
0
+1
0
+1
0
+1
0
+1
0
+1
0
+1
0