СӨ Борокуратуурата хоруупсуйаны утары сокуону тутуһууну бэрэбиэркэлээтэ. Бэрэбиэркэ быһаарбытанан, «Сахаплемхолбоһук» АУо урукку салайааччыта уопсастыба аатыттан уонна уопсастыба интэриэһигэр, Ил Түмэн икки дьокутаатыгар 900 тыһыынча солкуобай харчыны сокуоннайа суохтук биэрбит.
Бу дьокутааттар онто да суох сулууспаларын боломуочуйатыгар киирэр дьайыылары оҥороллоругар диэн, ол эбэтэр, өрөспүүбүлүкэ бүддьүөтүттэн бу тэрилтэҕэ үбүлээһининэн хааччыйыыга төһүү буолалларыгар.
Өрөспүүбүлүкэ борокуратуурата итинэн сибээстээн, «Сахаплемхолбоһук» акционернай уопсастыбаҕа РФ Административнай кодексатын 19.28-с ыст. 1 чааһынан, ол эбэтэр, юридическай сирэй аатыттан сокуоннайа суохтук манньалааһын бэлиэтэ баарынан, административнай дьыала тэрийбитэ.
Суут дьыаланы көрөн, «Сахаплемхолбоһук» уопсастыбаны административнай сокуону кэһиигэ буруйдааҕынан билинэн, 1 мөлүйүөн солкуобай ыстараап төлүүргэ уурбут.
Суут уурааҕа күүһүгэр киирэ илик, өрүттэр ааһыныахтарын сөп.
Оттон Ил Түмэн дьокутааттарын бэриги ылыыга холуобунай дьыалалара билигин Дьокуускай куорат федеральнай суутугар көрүллэ сылдьар.
Бу туһунан СӨ Борокуратууратын пресс-сулууспата иһитиннэрдэ.
Биһиги корр., «Саха сирэ» хаһыат, edersaas.ru
Хаартыска: ЯСИА.