Сахамин Афанасьев ойуур баһаардарын умуруоруу уонна үбүлээһин боппуруостарын туһунан кэпсээтэ
СӨ айылҕаны туһаныыга, ойуур хаһаайыстыбатыгар уонна экологияҕа миниистирэ Сахамин Афанасьев ойуур баһаардарын утары охсуһуу итиэннэ туһааннаах үлэҕэ төһө үп-харчы көрүллэрин туһунан кэпсээтэ.
-Ыраах, кытыы сытар сирдэргэ турбут ойуур баһаардара хонтуруолга ылыллыбаттар дуо? Уоту нэһилиэнньэ бэйэтин күүһүнэн умулларар дуо?
— Оннук буолбатах. Биһиги хас биирдии баһаары куосмастан кэтээн көрүүнэн барытын хонтуруоллуу, көрө олоробут. Ханна баһаар тахсыбыта билиннэҕинэ, тута авиапатрулга сорудах биэрэн, лүөччүк баһаар турбут сиригэр көтөр. Миэстэтигэр тиийэн быһыыны-майгыны кытары билсэр. Анаалыс оҥорбутун кэннэ, биһиги хайдах хабааннаахтык үлэлииргэ быһаарыныы ылынабыт. Суол-иис суох сиригэр авиацияны көмөҕө ыҥырабыт. Оройуоҥҥа баһаары умуруорууга күүс, тэрил баар буоллаҕына, муниципальнай таһымнаах бэрэстэбиитэллэри ыытабыт. Манна биири этиэххэ наада, биһиги сирбит киэҥ-куоҥ буолан, баһаары умуруорууга дьон тиийбэт буолуон сөп. Ол гынан баран үлэ ыытыллар.